Ka përfunduar takimi mes kryetarit të Partisë Demokratike, Lulzim Basha, dhe aleatëve të opozitës. Në fokus të takimit që zgjati rreth një orë në selinë blu ka qenë kriza politike në vend.
Ndërkohë, kreu i PBDNJ, Vangjel Dule është shprehur pas takimit se zgjedhje vetëm me Partinë Socialiste nuk do të zhvillohen në qershor.
Dule tha se nesër në orën 11:00 partitë e koalicionit opozitar do të zhvillojnë një takim me Presidentin e vendit Ilir Meta.
Kreu i PBDNJ, shtoi se arroganca e kryeministrit Edi Rama nuk i shërben zgjidhjes së krizës politike.
“Siç jeni në dijeni nesër në orën 11:00 do të zhvillohet takimi me Presidentin Meta. Do ti paraqesim platformën tonë, që përbën një bazë të mirë për të nisur përpjekjen e të gjitha palëve për konsensusin e domosdoshëm, që kërkon realiteti jonë. Zgjedhje me një palë nuk duhet, nuk mund dhe nuk do të ketë. Arroganca, prepotenca e zotit Rama nuk i shërben këtij objektivi”,-tha Dule.
Ndërkohë, kryetari i Partisë Republikane, Fatmir Mediu tha se qëndrimi është i njëjtë, duhet zgjidhje të situatës politike pa Edi Ramën kryeministër.
“Kemi të njëjtën qëndrim për situatën, garantimi i zgjedhjeve të lira dhe të ndershme pa Edi Ramën kryeministër dhe me një qeveri tranzitore. Presidenti i Republikës organizon tryezën jo nga dëshira jonë, por për shkak të situatës së rënë politike për të ndaluar një konflikt që po përkeqësohet çdo ditë e më tepër.
Nuk përcaktojmë ne se kush është kryetari i PS, as nuk përcakton Rama se kush është kryetari i PD apo i partive të tjera. Çdo parti përfaqësohet me kryetarin që ka zgjedhur. Kryeministri për ne nuk duhet të jetë Edi Rama. Kryeministri për ne është pjesë e problemit dhe nuk është pjesë e zgjidhjes. Për këtë arsye ne nuk pranojmë Edi Ramën kryeministër që të jetë zgjidhja për zgjedhje të lira dhe të ndershme:,-tha Mediu
Partitë e vogla po tentojnë të ulin sërish përballë njëri- tjetrit Edi Ramën dhe Lulzim Bashën për ti dhënë vendit nje zgjidhje jo vetëm politike por edhe kushtetutese përmes një tryeze të thirrur nga Presidenti Ilir Meta. / Opinion.al E.Xh.
