Ditët e fundit, në dy raste, në kuadrin e fushatës për zgjedhjet vendore, ka pasur përdorim të mjediseve kishtare për qëllime politike.
Kisha Ortodokse Autoqefale e Shqipërisë ka reaguar ashpër lidhur me këto takime. Ajo e ka cilësuar të ‘papranueshëm’ zhvillimin e fushatave elektorale brenda ambienteve të kishave, siç ishte rasti i kandidatit të Tepelenës, Tërmet Peçi.
“Në Kurjan të Roskovecit, në Mitropolinë e Fierit, është bërë një prezantim kandidati në mjediset e kishës monument kulture të Shën Nikollës dhe në fshatin Lekël të Tepelenës, në Mitropolinë e Gjirokastrës, ka pasur gjithashtu një takim politik parazgjedhor në mjediset e kishës së Profetit Ilia, të dyja pa dijeninë e Mitropolive përkatëse” thuhet në reagimin e Kishës Ortodokse
Përdorimi i ambienteve të brendshme të kishave të shenjta për aktivitetet politike në fushatat zgjedhore përbën një fyerje të ndjenjave fetare komunitare dhe institucionale, thuhet ne reagimin e Kishës Ortodokse autoqefale.
Veprimet, thotë ajo, janë në kundërshtim me marrëveshjen ndërmjet Këshillit të Ministrave të Republikës së Shqipërisë dhe Kishës Orthodhokse Autoqefale të Shqipërisë në vitin 2009. /Opinion.al
