Teksa ndodhet në Moldavi ku po merr pjesë në samitin e Komunitetit Politik Europian, Kryeministri Edi Rama ka publikuar një video, ku shfaqet duke biseduar në një tavolinë me Presidentin e Serbisë, Aleksandar Vuçiç, Presidenten e Komisionit Evropian, Ursula von der Leyen, kryeministrin e Holandës Mark Rutte, dhe kryeministrin e Slovenisë.
Krahas videos të publikuar në rrjetin social “Facebook”, kryeministri Rama shkruan se konflikti në Veriun e Kosovës duhet të zgjidhet krah për krah me botën demokratike dhe duke finalizuar marrëveshjen e normalizimit dhe njohjes së ndërsjellë mes Kosovës e Serbisë.
“Rajoni duhet të hyjë në një marrëdhënie të re me BE-në, ndërkohë që konflikti në Veriun e Kosovës duhet të zgjidhet krah për krah me botën demokratike, duke u dhënë fund absurdit kërcënues e duke finalizuar marrëveshjen e normalizimit dhe njohjes së ndërsjellë mes Kosovës e Serbisë”-shkruan Rama.
