Gjykata e Apelit ka lënë në fuqi vendimin për nisjen e hetimeve ndaj Autoritetit të Dosjeve pas padisë së kryetarit të Partisë së Lirisë, Ilir Meta.
Në vendim thuhet se Gjykata e Rrethit Gjyqësor Tiranë ka vendosur shfuqizimin e vendimit “Për mosfillimin e proçedimit penal” të Prokurorisë së Rrethit Gjyqësor Tiranë, dhe detyrimin e Prokurorisë së Rrethit Gjyqësor Tiranë që të regjistrojë procedimin penal për kallëzimin e bërë nga Meta.
“Në Gjykatën e Rrethit Gjyqësor Tiranë, është shqyrtuar çështja penale që i përket ankuesit Ilir Metaj, me objekt: Ankimin ndaj vendimit “Për mosfillimin e procedimit penal”, datë 21.09.2022 të Prokurorisë së Rrethit Gjyqësor Tiranë, në lidhje me kallëzimin penal nr. 11409, datë 06.09.2022. Paraqitur nga ankuesi, ndaj anëtarëve të Autoritetit për Informim mbi dokumetat e ish-Sigurimit të Shtetit, Tiranë.
Gjykata e Rrethit Gjyqësor Tiranë me vendimin nr. 1959 Akti, datë 18.11.2022 ka vendosur: Shfuqizimin e vendimit datë 21.09.2022 “Për mosfillimin e proçedimit penal” të Prokurorisë së Rrethit Gjyqësor Tiranë, në lidhje me kallëzimin penal Nr.11409, datë 06.09.2022. Detyrimin e Prokurorisë së Rrethit Gjyqësor Tiranë të regjistrojë procedimin penal për kallëzimin penal nr. 11409, datë 06.09.2022 dhe të kryejë hetimet përshkruar në pjesën arsyetuese të këtij vendimi. Çështja në apel u shqyrtua mbi bazën e ankimit të bërë nga Prokuoria pranë Gjykatës së Shkallës së parë Tiranë, që kërkoi ndryshimin e vendimit të gjykatës dhe lënien në fuqi të vendimit mbi “Mosfillimin e procedimit penal”, thuhet në njoftimin zyrtar të kësaj Gjykate.
Kujtojmë se ish-Presidenti e bëri këtë kallëzim në 1 Shtator të vitit të kaluar, ku pretendoi se Autoriteti i Dosjeve ka kryer 6 shkelje ligjore.
Meta mohoi lidhjet e tij me Sigurimin e Shtetit, duke theksuar se ka marrë çertifikata të pastërtisë nga komisioniet shtetërore dhe nga Autoriteti i Dosjeve.
Ish-presidenti akuzoi Autoritetin e Dosjeve për shpërdorim detyre, falsifikim të dokumenteve shtetërore, falsifikim kompjuterik, falsifikim vulash, të stampave ose formularëve, përhapje të informatave të rreme dhe zbulimin e akteve ose të dhënave sekrete.
