Ashpërsohen tonet brenda së majtës.
Ministri i Brendshëm, Saimir Tahiri i është përgjigjur sot botuesit të gazetës “Shekulli”, njëherazi anëtar i PS, ish-deputetit, Koço Kokëdhima. Kujtojmë se një ditë më parë, kjo gazetë botoi një raport të SHISH për trafikun e drogës në vend. Tahiri thotë se nuk ka asgjë të vertetë. Sipas tij, raporti është sajuar nga llumi i politikës, duke lënë të nënkuptuar Kokëdhimën. Më tej shprehet: “disa njerëz shpifin pasi u janë prishur interesat e tyre, personale dhe ndonjëherë kriminale”.
Pyetje: Në lidhje me një pjesë të raportit të SHISH të publikuar dje në lidhje me kultivimin e hashashit në Shqipëri, por dhe me implikimin e efektivëve të Policisë, një koment, zoti ministër?
Ministri Tahiri: Nuk jam në dijeni që ka një raport të tillë. Policia ka reaguar zyrtarisht. Bëhet fjalë për një përpjekje mjaft intensive për të përbaltur punën e Policisë së Shtetit. Dhe tashmë, përveç SHQUP-it, hyjnë dhe segmente të caktuara të medias, të cilat kanë edhe guximin të fabrikojnë medemek “raporte” herë nga Shërbimi Informativ herë nga partnerët, të cilat nuk ekzistojnë askund. Dhe që synojnë përbaltjen e punës së Policisë.
Gjithsesi, unë nuk do të doja që këtë ditë të shënuar sot ta shpenzoja me pallavrat që është mësuar ky cikël llumi në politikë dhe në disa segmente të medias ndaj të gjithë atyre që nuk përputhen me interesat politike, personale dhe shpeshherë kriminale.
Proncimi u bë në çelje të Muajit Kombëtar Antitrafik, ku ministri Tahiri merrte pjesë.
