Partia Demokratike akuzoi Ministrin e Brendshëm, Saimir Tahiri, se në kundërshti me ligjin dhe Kushtetutën po përgjon opozitën, ambasadorë e gazetarë, përmes një pajisjeje të instaluar në zyrat e Drejtorisë së Policisë.
Nënkryetari i Komisionit të Sigurisë, Flamur Noka, tha se opozita do të kërkojë të hënën një seancë dëgjimore me me Ministrin e Brendshëm, Drejtorin e Përgjithshëm të Policisë së Shtetit dhe kreun e SHISH -it, për atë që demokratët e cilësojnë skandal politik, që kompromenton rëndë sigurinë kombëtare dhe luftën kundër krimit dhe korrupsionit.
Flamur Noka – Nën/Kryetar i Komisionit të Sigurisë: “Tahiri mban një pajisje përgjimi të paligjshme, sepse ky veprim kryhet vetëm nga Prokuroria dhe me autorizimin e saj. Me të drejtë lind pyetja, për çfarë e përdor Tahiri këtë pajisje përgjuese telefonatash, kur baroni i drogës Balilaj u arratis edhe pse e kërkonte gjysma e botës dhe u bë kronikë deri tek CNN. Tahiri përgjon e regjistron telefonatat e rivalëve të bandave të tij. Tahiri përgjon rivalët politikë të Edi Ramës, opozitën, gazetarë dhe ambasadorë të rëndësishëm”.
Zyrtarisht policia, pas kërkesës së bërë nga Prokuroria për të sekruestuar pajisjen e paligjshme, tha se pajisja “IMCI Catcher” i përket Interfocës italiane në Shqipëri dhe po shfrytëzohet për trajnime.
Akuzave të opozitës, Ministri Tahiri u është përgjigjur me një reagim ku thotë se, tanimë fronti i së keqes ka shkuar përtej opozitës.
