“Vladimir Gjuta, personi që u akuzua për vendosjen e tritolit tek farmacia e babait të Saimir Tahirit është përgjuar me pajisjen e Interforces italiane IMSI Catcher”. Lajmi bëhet i ditur nga TCH, që i referohet burimeve nga Prokuroria e Tiranës.
Organi i akuzës ka dyshime se pajisja përgjuese është përdorur në Shqipëri jo vetëm për trajnime. Në një rast dyshohet se pajisja është dërguar në burg për të gjurmuar telefonin e Vladimir Gjutës, i cili mbahej në paraburgim, i dyshuar për tritolin tek farmacia e Tahirit.
Vladimir Gjuta doli nga burgu më 25 Prill të këtij viti, pasi prokuroria nuk arriti të provojë dyshimet rreth tij. Ndërsa pajisja përgjuese ka hyrë në Shqipëri në muajin Mars 2016.
Kush është Vladimir Gjuta?
Vladimir Gjuta, është hetuar për disa muaj, si autor i dyshuar i vendosjen së tritolit në farmacinë e babait të ministrit të Brendshëm Saimir Tahiri. Ai u arrestua me bujë në Qershor 2015 në tunelin e Kalimasht. Hetimet për të u zhvilluan deri në Proll 2016 kur Prokuroria pushoi çështjen. Krimet e Rënda thanë se kishin zhvilluar hetimet ndaj personave të dyshuar nën masën e sigurisë “Arrest me burg”. Më pas, gjatë hetimeve janë kryer një sërë veprimesh procedurale, përfshirë edhe ekspertiza, në bashkëpunim me partnerët ndërkombëtarë. “Në përfundim të këtyre hetimeve nuk u provua shkencërisht dhe nuk u siguruan fakte se personat e arrestuar (Vladimir Gjuta dhe Baftjar Bruka) ishin organizatorë të shpërthimeve me tritol”, shkruante njoftimi i prokurorisë.
