Ministri i Brendshëm Saimir Tahiri ka pranuar se është vështirë të zbulohen grabitësit e karburanteve ndaj u ka propozuar pronarëve të heqin shërbimin me para cash dhe të vendosin automatët elektronik. Pra vetëshërbim për drejtuesit e mjeteve që furnizohen natën në pikat e shitjes së naftës, benzinës, gazit, etj.
Ai tha se në 5 vjet janë vjedhur dhe grabitur 170 karburante dhe janë zbuluar jo më shumë se 40% e tyre. Kjo sepse jemi përpara një lloj fenomeni kriminal që ka vështirësi në hetim, theksoi ministri.
“Unë iu jam adresuar me një letër që synoj bashkëbisedimin paraprak mbi të cilin duhet të shohim mënyrën sesi të marrim masa që këta faktorë nxitës ti bëjmë zero, që të ekiminojmë vjedhjen dhe grabitjen e karburanteve në të gjithë Shqipërinë.:E para dhe më e domosdoshmja është eliminimi i parave cash gjatë natës në të gjitha pikat e karburanteve në Shqipëri dhe kjo të bëhet duke përdorur teknologjinë dhe duke përdorur mundësinë që paratë mos i mbajë në xhep operatori shitës i karburantit, por të paktën gjatë natës të jenë pjesë komunikimit që ka qytetari, konsumatori me një automat elektronik që garanton siguri maksimale.
E dyta masë e domosdoshme është sistemi i kamerave. Thuajse të gjithë pa përjashtim sot keni bërë investimet tuaja personale për të pasur një sistem kamerash për të pasur në çdo pikë karburanti. këtë e keni bërë si pasojë e vetëdijes tuaj se duhet ky investim për të qenë më të siguritë. Thuajse të gjithë e keni bërë këtë mbi bazën e njohurive personale apo profesionale pa një konsultim me policinë, sepse kjo çështje nuk ka qenë as në vëmendjen e policisë më parë”, tha ministri i Brendshëm.
Tahiri propozon gjithashtu që me anë të teknologjisë, në pikat e karburantit të bëhet identifikimi i targës së makinës, nëse është e flasifikuar apo jo.
