TIRANË- Do të ketë një ligj të ri për emigrantët, i cili synon regjistrimin një më një të gjithë shqiptarëve që jetojnë jashtë vendit. Duke prezantuar këtë draft, ministri i Brendshëm, Saimir Tahiri tha se jemi 4.4 milionë shqiptarë, por s’dimë sa prej tyre banojnë në Shqipëri dhe sa prej tyre janë në emigracion.
“Sipas shifrave janë mbi 4.4 milionë shqiptarë, por ne nuk dimë sa janë këtu dhe ku dhe sa janë jashtë dhe ku. Dimë që shteti e ka të vështirë t’u shkojë pas për të bërë detyrën e vet, të japë shërbime me cilësi për ata që jetojnë këtu dhe jashtë Shqipërisë”, u shpreh Tahiri.
Tahiri theksoi se ka ardhur koha për një kontratë të re patriotike me emigrantët. “Shteti ka detyrë të garantojë shërbime për shqiptarët që jetojnë jashtë Shqipërisë në shtëpinë e tyre. Mendojmë që borxhi që u kemi emigrantëve në mbi dy dekada, është t’u shërbejmë emigrantëve në shtëpinë e tyre. Të bëjmë regjistrimin e tyre dhe mbrapsht t’u japim shërbimet në shtëpinë që banojnë, kudo qoftë kjo”.
Ministria e Brendshme ka hartuar një projektligj dhe nga janari nisim regjistrimin e banesës për çdo qytetar shqiptar që jeton jashtë Shqipërisë.
