Tenistja amerikane Serena Williams, numri 1 në botë për femra, është eliminuar sot në mëngjes nga Lojërat Olimpike “Rio 2016”, pasi u mund 2-0 nga rusja Elina Svitolina në turin e tretë. Pas dy fitoreve në dy turet e para, Williams detyrohet të dorëzohet në raundin e tretë, duke mos patur mundësi të avancojë në çerekfinalet e Olimpiadës. Ajo u mund 6-4, 6-3 në dy setet e lojës, duke mos mbrojtur dot të artën e katër viteve më parë. Edhe pse publiku e mbështeti gjatë gjithë kohës, kjo nuk mjaftoi dhe Serena largohet kokëulur nga Olimpiada e saj më e dobët në karrierë.
Është eliminuar edhe tenistja spanjolle Garbine Muguruza, fituese këtë vit e Roland Garros. Ajo u mund 2-0 (6-1, 6-1) nga Monica Puig e Porto Rikos, një humbje befasuese për spanjollen, që ishte ndër favoritet për të fituar medalje në “Rio 2016”. Tashmë favoritja për të artën në Olimpiadë është tenistja gjermane Angelique Kerber, që ka avancuar në çerekfinale, pas triumfit 2-0 ndaj australianes Samantha Stosur. Ndër të tjera, në çerekfinalet e femrave janë edhe britanikja Johanna Konta, amerikania Madison Keys, çekja Petra Kvitova, që gjithashtu synojnë një medalje në Olimpiadë.
Te meshkujt ende nuk janë përcaktuar tetë tenistët më të mirë, pasi janë luajtur vetëm dy raundet e para. Në të tretin ka avancuar britaniku Andy Murray, që pas eliminimit të Djokovic është bërë pretendenti kryesor për të artën. Britaniku eliminoi në ndeshjen e fundit Juan Monaco, ndërkohë që nuk zhgënjen edhe spanjolli Rafael Nadal. Ai ndodhet në raundin e tretë, ndërkohë që në sfidën e fundit mposhti 2-0 italianin Andreas Seppi. Avancojnë në raundin e tretë edhe japonezi Kei Nikishori, belgu David Goffin, francezët Simon e Monfils si dhe kroati Cilic.
