Forca në FNSH-së dhe repartit RENEA vazhdojnë kërkimet për gjetjen e tre grabitësve, që një ditë më parë arritën të merrnin paratë e një banke të nivelit të dytë, teksa po transferoheshin nga aeroporti i Rinasit jashtë vendit.
Policia e Fushë-Krujës deri tani ka shoqëruar rreth 50 persona gjatë orëve të natës në lidhje me këtë ngjarje, por nuk ka asnjë gjurmë konkrete rreth grabitësve.
Rreth orës 14:15 minuta, të ditës së enjte, tre persona të armatosur prenë menteshat e një prej portave hyrëse, që të çojnë në pistën e aeroportit dhe më pas hynë me një automjet.
Në të njëjtën kohë, nga terminali ishte nisur makina e kompanisë së ruajtjes fizike “Nazeri 2000”, që transportonte disa miliona euro, drejt avionit që do t’i transferonte paratë jashtë vendit.
Tre personat, pasi i prenë rrugën makinës së blinduar, nën kërcënimin e armëve morën thasët me para dhe u larguan nga e njëjta derë. Nuk sqarohet nëse ka patur të shtëna me armë, por ekspertët janë duke punuar për të konfirmuar dyshimet.
Autorët u larguan më pas drejt Fushë – Prezës, ku edhe i vunë flakën makinës tip Benz për të humbur gjurmët. Automjeti i djegur u gjet disa minuta më vonë nga policia, në arat e zonës. Mësohet se makina që u përdor në grabitje ishte vjedhur në Pogradec para disa ditësh dhe pronari kishte denoncuar në polici.
