Ish-zëvendëspresidenti amerikan, Joe Biden, ka kryesuar bindshëm në garën për të zgjedhur kandidatin demokrat për zgjedhjet presidenciale, duke fituar 9 nga 14 shtetet që votuan.
Biden fitoi në Teksas, Masaçusets, Minesota, Oklahoma, Arkansas, Alabama, Tenesi, Karolinën e Veriut dhe Virxhinia. Ai e paraqet veten si një pragmatist i fuqishëm i cili do të sjellë ndryshim dhe do të rivendosë “dinjitetin” pas presidencës së Trumpit. Megjithatë, kritikët thonë se fushata e tij nuk është motivuese.
“Gjithçka bëhet për të rikthyer shpirtin e Amerikës. Mua më pëlqen shumë kjo pjesë, të bashkohemi të gjithë”, tha ai pas daljes së rezultateve paraprake.
Nga ana tjetër, kundërshtari i tij më i fortë, senatori Bernie Sanders parashikohet të fitojë Kaliforninë, që konsiderohet edhe si çmimi i madh i mbrëmjes, për shkak të numrit të madh të delegatëve. Ai triumfoi gjithashtu në Kolorado dhe Juta.
Sa i takon kandidatëve të tjerë, ish-kryebashkiaku i Nju Yorkut, miliarderi Michael Bloomberg, nuk fitoi asnjë shtet të vetëm dhe pse shpenzoi më shumë se gjysmë miliardë dollarë në fushatën e tij. Disfatën më të rëndë e pësoi, Elizabeth Warren, e cila humbi edhe në shtetin e saj, Masaçusets.
Në zgjedhjet e “super së martës”, kandidatët garojnë për më shumë se 1300 nga 1991 delegatët e nevojshëm, për të siguruar nominimin e partisë në muajin korrik, për zgjedhjet presidenciale në SHBA, të cilat priten të mbahen në fund të vitit./Opinion.al
