Qeveria e Kosovës ka reaguar pas sulmeve kibernetike të llojit DDoS mbi sistemet qeveritare kosovare të ndodhura gjatë javës së kaluar .
Përmes një njoftimi në faqen zyrtare në “Facebook”, qeveria bëri me dije se nuk janë cenuar të dhënat e ruajtura në Qendrën Shtetërore të të Dhënave të Institucioneve të Kosovës. Po ashtu thuhet se të gjitha shërbimet qeveritare janë plotësisht të aksesesueshme dhe se nuk ka probleme në funksionimin e tyre.
“Gjatë javës së kaluar, në periudha të caktuara kohore, sistemet qeveritare janë ballafaquar me sulm kibernetik të llojit DDoS që ka shkaktuar pengesa të herëpashershme në shërbimin e internetit brenda institucioneve qeveritare dhe mungesë të herëpashershme të qasjes në disa shërbime qeveritare. Gjatë periudhave të sulmit, ekipi i sigurisë kibernetike në ASHI është angazhuar maksimalisht që impakti i sulmit në qasshmërinë dhe funksionalitetin e shërbimeve të jetë sa më i vogël. Në bashkëpunim me ekspertët e jashtëm, me aplikimin e masave adekuate, sulmi kibernetik është tejkaluar dhe janë parandaluar tentativat për vazhdim të sulmit. Të gjitha shërbimet qeveritare janë plotësisht të qasshme dhe nuk ka pengesa në funksionimin e tyre. Gjatë këtij sulmi kibernetik në asnjë moment nuk janë cenuar të dhënat e ruajtura në Qendrën Shtetërore të të Dhënave në kuadër të Institucioneve të Republikës së Kosovës”, thuhet në njoftim./Opinion.al
