Gjykata e Apelit në Tiranë ka shfuqizuar ditën e sotme masat e sigurisë për 5 punonjësit e IT-së, në Ministrinë e Brendshme dhe Departamentin e Administratës Publike, të cilët u akuzuan për shpërdorim detyre lidhur me sulmin kibernetik ndaj institucionit shtetëror të AKSHI-t që përmbledh gjithë faqet zyrtare qeveritare në Shqipëri.
Gjykata e Rrethit Gjyqësor Tiranë kishte caktuar masën “detyrim për t’u paraqitur në policinë gjyqësore”, për Rudina Llagamin, Albi Gjekën, Altin Sallakun, Alketa Sulon dhe Igli Lubonjën, ndërkohë që sot Apeli ka hequr masat.
“Referuar raportimeve te mëparshme ne media, lidhur me procedimin penal për sulmin kibernetik në pajisjet dhe sistemet që administrohen e menaxhohen nga AKSHI, mbi kërkesat e prokurorit, Gjykata e Rrethit Gjyqësor Tiranë, ka caktuar ndaj personave nën hetim Znj. A. S., Z. I. L., Znj. R. Ll., Z. A. S. masën e sigurimit personal “detyrim për tu paraqitur në policinë gjyqësore”, si të dyshuar për veprën penale të “shpërdorimit të detyrës”
Mbi ankimet e personave nën hetim të sipërcituar, Gjykata e Apelit Tiranë, e përbërë nga gjyqtari Z. Genti Shala, me vendimet respektive të datës 22.12.2022, vendosi të shfuqizojë vendimet e marra nga gjykata e shkallës së parë për caktimin e masës së sigurimit”-thuhen ne njoftim.
Shqipëria ra pre e sulmeve kibernetike tnga Republika Islamike e Iranit. Një sulm kibernetik u shënua më 15 korrik të këtij viti, që bllokoi shërbimet online në të gjitha faqet zyrtare shtetërore dhe platformën e-Albania.
Ndërkohë, më 14 shtator u sulmua sistemi TIMS në të gjitha pikat kufitare të vendit.
