Deputeti i PS-së, Erion Braçe ka reaguar ashpër për tensionet dhe përplasjet e krijuara në Kuvend nga opozita.
Braçe ka theksuar se sulmi fizik në Kuvend po kthehet në legjitimitet dhe kjo është shumë e rëndë.
Sipas tij ardhja me shishe benzine në Kuvend do të thotë që është mirëmenduar që sulmi fizik të jetë vdekjeprurës.
“Ka një problem shumë të madh. Dëgjova më herët zëra të arsyeshëm nga opozita që i vlerësoj, por dëgjova edhe zëra që bëhen qesharakë. Thonë që ne jemi shkaku, dhe kjo është qesharake. Problemi në atë anë ka vetëm një emër që e mban Shqipërinë prej 34 vitesh peng.
Ky është problemi shumë i madh për Shqipërinë që po e çon në shuarje atë parti andej. Në këtë sallë sulmi fizik po fiton legjitimitet, kjo është gjëja më me ndyrë. E ka kafsha, por nuk mund ta kenë njerëzit. Sulmi fizik po bëhet agresiv deri në rrezik të jetë. Të vish me shishe benzine në çantë do të thotë që e ke menduar mirë që sulmin fizik ta bësh vdekjeprurëse.
E ndodhur në një parlament në zemër të Europës është një ngjarje e tmerrshme. Të shkosh para parlamenti Europian nuk e di çdo të bëjnë këta…Për akte të tilla e sulme të tilla fizike duhet të ketë qëndrim sipas ligjeve penale të Republikës së Shqipërisë”, tha Braçe.
