Kryeministri Edi Rama ka dënuar sulmin ndaj Policisë së Kosovës dhe EULEX në veri të Kosovës nga serbët.
Përmes një postimi në Twitter, Kryeministri ndër të tjera shkruan se barrikadat e vendosura nga serbët e veriut të Kosovës duke bllokuar rrugët, janë në kundërshtim me ligjin.
“Sulmet mbi EULEX Kosovo janë të dënueshme pa asnjë ekuivok ashtu siç është i dënueshëm çdo akt dhune ndaj Policisë së Kosovës. Rishfaqja e barrikadave në Veri të Kosovës, bie ndesh me çdo ligj e çdo frymë dialogu e jo vetëm nuk zgjidh asgjë, po përkundrazi komplikon më tej çdo gjë”–shkruan Rama.
Më tej, Rama thotë se shtyrja e zgjedhjeve në veri nga Presidentja Osmani është tregues që Serbia të mos lejojë përshkallëzimin e konfliktit, ndërsa i bën thirrje Serbisë që të ushtrojë ndikim mbi serbët e veriut të Kosovës pa i justifikuar veprimet e tyre.
“Shtyrja e votimeve nga ana e Presidentes së Republikës së Kosovës është një sinjal kuptimplotë, të cilit autoritetet e larta të Beogradit duhet t’i përgjigjen me të njëjtën frymë dhe ndjenjë përgjegjësie, për moslejimin e përshkallëzimeve të mëtejshme të akteve destabilizuese. Beogradi duhet të ushtrojë ndikimin e vet mbi serbët e Veriut të Kosovës, pa i justifikuar asesi veprimet e tyre cilatdoqofshin arsyet! Arsyet diskutohen nuk përdoren si armë kundër policisë e si barrikada kundër rendit ligjor. BE-ja duhet të thërrasë urgjent tryezën e dialogut”-shkruan Rama.
Së fundmi edhe NATO ka reaguar dhe e ka cilësuar sulmin ndaj EULEX të papranueshem, ndërsa ka shtuar se autorët duhet të mbajnë përgjegjësi.
