Pasi u shkarkua nga detyra e sekretares së Brendshme të Mbretërisë së Bashkuar, Suella Braverman i shkroi një letër të ashpër kryeministrit Rishi Sunak, duke thënë se përgjigja e tij ndaj kërcënimit në rritje të radikalizimit në vend kishte qenë e dobët.
Braverman tha se ajo pranoi të mbështeste Sunak për shkak të garancive të forta që ai i dha asaj për prioritetet kryesore që përfshinin një reduktim të migrimit të përgjithshëm ligjor.
Ish-sekretarja e Brendshme tha se për një vit, ajo i kishte dërguar letra të shumta kryeministrit për temat kryesore, por u pritën me mospërfillje dhe mungesë interesi.
“Ju keni dështuar në mënyrë të qartë dhe të përsëritur në përmbushjen e secilës prej këtyre politikave kryesore. Ose stili juaj i veçantë i qeverisjes do të thotë se nuk jeni në gjendje ta bëni këtë. Ose, siç duhet të përfundoj me siguri tani, ju kurrë nuk keni pasur ndonjë qëllim të mbani premtimet tuaja. ”, tha Braverman.
“Refuzimi juaj i kësaj rruge nuk ishte thjesht një tradhti e marrëveshjes sonë, por një tradhti e premtimit tuaj ndaj kombit se do të bënit “çfarëdo që të duhej” për të ndalur varkat.”, shton ajo.
Ajo tha gjithashtu se Sunak kishte dështuar të përmbajë incidentet antisemitiste në Mbretërinë e Bashkuar pas një sulmi brutal nga Hamasi ndaj Izraelit.
“Një shkak tjetër për zhgënjim – dhe konteksti për artikullin tim të fundit në The Times – ka qenë dështimi juaj për t’u përballur me sfidën e paraqitur nga antisemitizmi dhe ekstremizmi gjithnjë e më i egër i shfaqur në rrugët tona që nga mizoritë terroriste të Hamasit të 7 tetorit,” tha ajo.
Braverman tha se ajo i kishte kërkuar Sunak të konsideronte legjislacionin për të ndaluar marshimet e urrejtjes dhe për të ndihmuar në frenimin e “valës në rritje të racizmit, frikësimit dhe glorifikimit terrorist që kërcënon kohezionin e komunitetit”. “Britania është në një pikë kthese në historinë tonë dhe përballet me një kërcënim radikalizimi dhe ekstremizmi në një mënyrë të paparë për 20 vjet”, tha ajo.
“Me keqardhje them se përgjigja juaj ka qenë e pasigurt, e dobët dhe e mangët në cilësitë e lidershipit që i duhen këtij vendi. Në vend që të pranoni plotësisht ashpërsinë e këtij kërcënimi, ekipi juaj nuk u pajtua me mua për javë të tëra se ligji duhej të ndryshonte.” tha ish-sekretari i Brendshëm.
“Dikush duhet të jetë i sinqertë: plani juaj nuk po funksionon, ne kemi pësuar humbje rekord zgjedhore, rivendosjet tuaja kanë dështuar dhe po na mbaron koha. Ju duhet të ndryshoni kursin urgjentisht.”, shton ajo.
Sunak shkarkoi Bravermanin pasi ajo akuzoi policinë e qytetit se ishte e njëanshme gjatë trajtimit të tubimeve pro-palestineze në Londër. Ajo akuzoi Sunak se po ecën ngadalë në shumë premtime kyçe të bëra nga Partia Konservatore në manifestin e 2019-ës.
