Shërbimi Meteorologjik Kombëtar i Greqisë ka paralajmëruar qytetarët për një stuhi që pritet të përfshijë vendin fqinj, të quajtur “Barbara”.
Stuhia pritet të sjellë reshje të dendura dëbore në nivel lokal edhe në zonat fushore, temperatura të ulëta, erëra të stuhishme dhe ngrica.
“Barbara” do të godasë kryesisht Greqinë lindore, por ajo pritet të shtrihet dhe në Atikën veriore, verilindore dhe veriperëndimore.
Sakaq, Ministria për Mbrojtjen e Qytetarëve u ka dërguar një mesazh banorëve të zonave të rrezikuara që të tregojnë kujdes në orët në vijim pasi mund të përballen me rreziqe nga bora.
“Mesazh paralajmërues për reshje të rrezikshme bore nga mesdita e datës 02.05.2023 në veri, veri-lindje dhe veri-perëndim të Atikës. Kufizoni lëvizjet e panevojshme dhe ndiqni udhëzimet e Autoriteteve”, shkruhet në mesazhin që iu dërgua qytetarëve.
