Banorët e Bërxullës kanë dalë sërish në protestë këtë të dielë, për të kërkuar shpronësim sipas vlerës së tregut për tokat e tyre që preken nga projekti i rrugës Thumanë-Kashar. Sakaq zona është rrethuar nga forcat e policisë, të cilat formuan një barrikadë.
Kjo është e disata herë që banorët e kësaj zone dalin në protestë. Sipas tyre çmimi i tregut për pronat e tyre është rreth 50 euro për metër katror, ndërsa atyre u është ofruar një kompensim me rreth 4 euro për metër katror, gjë që e kanë refuzuar.
Banorët kanë deklaruar se do t’i mbrojnë pronat me gjak, ndërkaq kanë tentuar më tej të kalojnë në rrugë, ku janë përplasur edhe me kordonin e forcave policore.
“Nuk kemi pasur kontakt me instancat shtetërore. Nuk ka asnjë lloj komunikimi me ne si banorë, vijnë individë të veçantë të firmës, specialistë të rrugës për të bërë ndonjë kontakt me ne, por ata janë njerëz që nuk luajnë rol në kërkesat tona. Kërkesa e parë është vlerësimi i pronës sipas tregut ose të gjejmë një marrëveshje. E dyta është certifikimi i pronave sepse ka prona pa certifikata, dokumentet ndodhen në hipotekë.
Rruga ndan parcelat në mënyrë tërthore dhe nuk ka projekt si do jetë e aksesueshme toka në anën tjetër të rrugës sepse nuk ka publikim nëse do ketë mbikalime apo diçka të ngjashme. Kërkesat tona janë të panegociueshme në këto pika. Fshati rrezikon të zhduket i tëri, do ndahet në tre pjesë. Në shenjë proteste ne do tubojmë paqësisht për të sensibilizuar pushtetarët. Janë bllokuar punimet e parlamentit për një agjent të FBI-së, neve nuk na hyn në punë. Parlamenti është për të zgjidhur punët tona, jo të Amerikës. Edi Rama po e ka bërë le të shkojë i pandehur, kolltukun nuk e ka asnjëri pronë. Kemi 4 muaj”-tha një prej protestuesve.
