Të rinjtë preferojnë më shumë një trup të tonifikuar sesa një gjumë të mirë. Kështu shkruan një studim i cili ka në fokus personat që i përkasin gjeneratës Z, ku 1 në 5 prej tyre është përgjigjur se preferojnë të kenë më shumë muskuj barku sesa një gjumë të qetë.
Në këtë studim, ku morën pjesë rreth 1500 persona, të cilët kishin lindur pas vitit 1996, u nxorrën përgjigje tepër interesante prej tyre. Ata pranuan se bërja e një trupi të mirë duke përfituar kështu dhe një stomak më të tonifikuar, u jep atyre më shumë rëndësi sesa një gjumë i mirë gjatë natës.
Po kështu, thuhet se 21% e pjesëmarrësve që i përkasin kësaj gjenerate, thanë se do të vlerësonin më shumë një aktivitet fizik sesa të flinin mirë gjatë mbrëmjes.
Nga ky studim, ka rezultuar se 29% e pjesëmarrësve të kësaj kategorie grupmoshe, ushtrojnë rregullisht palestër, kryesisht gjatë orëve të hershme të mëngjesit, mes orës 5 dhe orës 10.
Megjithatë, edhe pse për një pjesë të konsiderueshme gjumi nuk përbën prioritet në krahasim me kryerjen aktiviteteve fizike, gati gjysma e pjesëmarrëve që i përkasin 45%, pranuan se gjendja e tyre fizike përmirësohet shumë nga një gjumë i mirë që marrin gjatë natës.
Ndryshe mendon një eksperte e gjumit, e quajtur Holly Milling e cila shpjegoi përse një gjumë i mirë nuk duhet nënvlerësuar.
“Gjumi është një mjet i fuqishëm dhe s’është e nevojshme të bëjmë këtë zgjedhje, mes të paturit një trup të tonifikuar (muskuj barku) dhe një gjumi që mund të na qetësojë. Një gjumë i një cilësie të mirë dhe të qëndrueshëm, në fakt, bën që të rritet perfomanca dhe përmirëson dukshëm gjendjen tuaj emocionale duke ju bërë të ndiheni më të motivuar dhe të jeni të fokusuar gjatë ditës. Ky faktor s’mund të bëhet pengojë qëllimet tuaj për të ushtruar palestër, përkundrazi do t’iu ndihmojë në mënyrë efektive për ti arritur objektivat që keni në lidhje me trupin tuaj”, u shpreh Milling.
I të njëjtit mendim është dhe një përfaqësues nga Myvitamins, i cili ka marrë pjesë në realizimin e këtij studimi të bërë në bashkëpunim.
“Nëse nuk keni fjetur mjaftueshëm, përditshmëria juaj mund të ndikojë ndryshe. Kjo bën që të mos jeni të përqëndruar dhe të keni luhatje të humorit deri tek rënie të energjisë si dhe performancës suaj atletike. Do ju sugjeroja suplementet që ndihmojnë për një gjumë më të mirë, veçanërisht nëse dietës suaj i mungojnë lëndët ushqyese specifike”, përfundoi ai mendimin e tij.
Një nga suplementet që rekomandohet për të përmirësuar cilësinë e gjumit është magneziumi, i cili jep efekte pozitive dhe i ndihmon njerëzit ti tejkalojnë vështirësitë me gjumin gjatë natës.
