Studentët në rrethe duket se janë ndarë në dy grupe të mëdha, ku një pjesë kërkon mësimin dhe një pjesë bojkotin dhe ngujimin deri në plotësimin e kërkesave.
Një grup me studentë protestues të Universitetit ‘Aleksandër Xhuvani’ që u ngujuan pasditen e të martës në ambientet brenda godinës kryesore marshuan drejt Fakultetit të Shkencave Teknike Mjekësore duke kërkuar solidaritetin e kolegëve. Me protestuesit u bashkuan një numër studentesh, ndërkohë që në mbrëmje pritet që studentët t’i rikthehen ngujimit. Nga ana tjetër në auditore është konstatuar shtim i studentëve që ndjekin leksionet dhe seminaret.
Studentët e kampusit universitar në Durrës pasi e kanë gdhirë natën e shkuar në ambientet e kampusit universitar, në ditën e dytë janë shprehur të bindur për të vijuar me bojkotin mësimor. Në ditën e dytë të protestës pati edhe studentë qe ju drejtuan auditorëve, ndërsa protestuesit këmbëngulin në plotësimin e kërkesave nga ana e kryeministrit Edi Rama.
Nderkaq një pjesë e studentëve në disa fakultete të Tiranës vijojnë bojkotin dhe ngujimin në fakultete të ndryshme. Gjatë ditës së sotme, studentët e Ekonomikut bllokuan derën kryesore dhe nxorën administratën jashtë.
Studentët kanë kanë bllokuar derën hyrëse të fakultetit me karrige si shprehje e rezistencës dhe vendosmërisë për pikat që kanë parashtruar për qeverinë.
Gjithashtu studentët e fakultetit të Ekonomisë kanë publikuar të dhënat në lidhje me një votim që kanë kryer, teksa nënvizohet se shumica dërrmuese e tyre vijojnë qëndresën, ndërsa një pjesë e vogël ka zgjedhur si alternativë për të vijuar mësimin.
