Kryeministri Edi Rama ka akuzuar sot Presidentin Ilir Meta se po i shërben partisë së tij dhe se është rreshtuar në kor kundër dialogut të qeverisë me studentët. Shkak për këtë reagim i bë vendimi i Metës për të mos dekretuar Buxhetin e Shtetit për vitin 2019.
Mesditen e sotme, rreth orës 13:30 në faqen e Presidencës u publikua lajmi se Presidenti nuk e dekreton buxhetin dhe kërkon që të rishikohet.
“Presidenti i Republikës SH.T.Z. Ilir Meta, duke ndjekur me shumë vëmendje situatën politike më të fundit në vend, si dhe duke vlerësuar konsensusin e gjerë publik mbi kërkesat e studentëve, të cilat janë konsideruar nga të gjithë aktorët politikë si, të drejta, legjitime dhe të realizueshme, duke synuar interesin më të mirë në përmbushjen e objektivave sociale të parashikuara në nenin 59 të Kushtetutës, si dhe në garantimin e stabilitetit në vend, me dekretin nr. 10997, datë 13.12.2018 ka vendosur “Kthimin për rishqyrtim në Kuvend të ligjit nr.99/2018 “Për buxhetin e vitit 2019”, me qëllim rishqyrtimin e tij.
Presidenti i Republikës, ka besimin e plotë se Kuvendi i Shqipërisë do të reflektojë një bashkëpunim gjithëpërfshirës me qëllim plotësimin e kërkesave të studentëve dhe interesit publik”.
Brenda 30 minutash, Kryeministri Rama reagon në Tëitter duke thënë se Meta ktheu buxhetin pas amendamentit që kërkoi LSI-ja.
“Interesant! Presidenti kthen buxhetin e Shqipërisë pas prezantimit të kërkesave të LSI-së.Asnjë çudi!Vazhdon papushim e në çdo formë,presioni mbi studentët për të qëndruar në kor kundër Dialogut.Miq!Dilni nga kurthi i atij kori dhe bëhuni individë që flasin në emër të vetes”, shkruan Rama.
Meta ka reaguar ndaj Ramës, përmes zëdhënësit Tedi Blushi i cili thotë se vendimi i Metës u mor pas thirrjes së Taulant Ballës në Parlament.
“Ja kur erdhi reagimi i Presidentit Meta për çështjen e Buxhetit. Pjesë nga deklarata e sotme në Kuvend e kryetarit të grupit parlamentar të PS, z.Taulant Balla:
Si ta ndryshoj unë buxhetin Petrit, kur buxheti është te Ilir Meta?
Buxheti sot është te Ilir Meta, nuk është në Kuvend. Është te Presidenti i Republikës. Të gjithë e dini që procedura e ndryshimit të buxhetit është një procedurë që nuk bëhet me dy gisht letër, po kjo është tallje.
28 vjet tallje dhe doni të bëni edhe 28 minuta tallje me studentët këtu në sallën e Parlamentit”, shkruan zëdhënësi i Metës.
