“Gëzimi dhe dhimbja janë të pandashme”, kjo është shprehja që e mban të fortë këngëtarin Stefi Prifti pas humbjes së bashkëshortes dhe e bën atë t’i përkushtohet më shumë dy vajzave të tij, por edhe dashurisë tjetër të madhe, muzikës.
Në një intervistë për Paloma, Stefi, që rrallë herë preferon të intervistohet, ka folur per projektin e ri veror “Bang Bang”, në bashkëpunim me Endrin dhe Laureshën, për pjesëmarrjen e tij në Crazy Calvin sezonin e ardhshëm, si dhe dy këngët që do të vijnë në shtator, një baladë rroku në bashkëpunim me Aleksandër Gjokën dhe një këngë me kuptim tepër të veçantë për të.
“Në shtator del një baladë rroku, në bashkëpunim me Aleksandër Gjokën. Më pas një këngë e kompozuar nga unë, me tekst të shkruar nga bashkëshortja ime Marina, muajin e fundit të jetës. Një këngë shpirtërore që do ta interpretoj me vajzën time të madhe, Marian”, thotë ai, duke shpresuar që njerëzit të gjejnë diçka nga vetja dhe humbjet e njerëzve të dashur.
Ai ka folur gjithashtu edhe për pjesëmarrjen në Crazy Calvin duke thënë se ka qenë një eksperiencë e bukur, por që deri tani është një dilemë nesë ai dhe Endri do të qëndrojnë gjatë sezonit të dytë.
