Shqipëria e paraeuropianit bëri përpjekjet maksimale për t’u ulur në tryezën e të mëdhenjve dhe falë punës, sakrificës, mundit dhe përkushtimit arriti t’ia dalë. U bë e madhe sepse mori pjesë për herë të parë në një kompeticion të rëndësishëm. Shqipëria e Europianit ishte e madhe sepse luajti si e barabartë me ekipe si Zvicra, Franca dhe Rumania.
Bëri ndeshje të bukura dhe luftoi deri në fund për të marrë rezultat. Arriti të fitonte ndeshjen e saj të parë në Europian dhe shpresoi deri në fund për kalimin e grupeve. Duke e quajtur një kapitull të mbyllur Europianin, tani nis një rrugëtim i ri për të shkuar në Rusi. Por, përpara se të presim biletën për në Rusinë e largët, duhet të mundim Maqedoninë.
Shqipëria duhet të sillet si një ekip i madh, që ka fituar eksperiencë dhe që di të mbajë presionin. Pjesëmarrja në Francë e ka pjekur ekipin e Xhani De Biazit. Gabimet e kanë mësuar, ndërsa fitorja me Rumaninë i ka dhënë petkun e madhështisë. Shqipëria duhet të tregojë se kualifikimi në Europian nuk ishte rastësi, por fryt i një projekti të vënë në jetë disa vite më parë.
Formacioni i Xhani De Biazit, që në fushën e lojës përfaqësohet nga futbollistë nga të gjitha trojet shqipfolëse, ka për detyrë të tregojë se di ta mbajë presionin dhe momentet e vështira t’i kthejë në forcë. Një fitore do të ishte nisja më e mirë për këto eliminatore që janë jashtëzakonisht të vështira, pasi kemi në grup Spanjën dhe Italinë. Ja përse duhet një Shqipëri e madhe.
Bilanci
Tetë ndeshje, vetëm një fitore, tri barazime dhe katër humbje. Nuk është bilanc me një Kombëtare të madhe, por me fqinjët e Maqedonisë. Për Shqipërinë, kundërshtari i sotëm është kthyer në makth në këto 22 vite ballafaqime. Të gjitha ndeshjet kanë qenë miqësore mes tyre dhe për herë të parë dy Kombëtaret janë përballur më 14 maj të vitit 1994.
Maqedonia fitonte thellësisht 5-1, teksa goli i vetëm për kuqezinjtë shënohej nga Altin Rraklli. Pesë vite më pas, në ndeshjen e dytë në historinë me fqinjët, Shqipëria reagon duke fituar 2-0 në “Qemal Stafa”, falë golave të Rudi Vatës dhe Erjon Bogdanit.
Si për ironi, që nga kjo ndeshje e luajtur më 10 shkurt 1999 e deri më tani, kur janë zhvilluar edhe 6 përballje të tjera, për Shqipërinë mbetet fitorja e vetme ndaj një kundërshtari si Maqedonia. Për herë të fundit skuadrat kanë luajtur më 15 nëntor 2011, në Maqedoni, teksa ndeshja ka përfunduar në barazim pa gola.
Janë dy barazime radhazi në fakt, pasi edhe takimi i parafundit në stadiumin “Skënderbeu”, në Korçë, është mbyllur 0-0. Sot, për herë të parë, Shqipëria dhe Maqedonia do të luajnë një ndeshje eliminatore mes tyre, teksa është e vlefshme për kualifikueset e Botërorit 2018 që do të zhvillohet në Rusi.
Tashmë duket se ka ardhur momenti që kuqezinjtë të thyejnë tersin Maqedoni. Kjo është hera e dytë që Shqipëria pret Maqedoninë në “Loro Boriçi”, pasi më parë kanë luajtur më 7 shkurt 2007, kur miqtë kanë fituar 0-1./PanoramaSport
