Kryeministri Edi Rama u është përgjigjur komentuesve në rrjetet sociale, teksa ka deklaruar se gjatë mandatit të katërt do të ndërtojnë dy spitale ultra modernë.
Komenti: Të uroj që të fitosh! Spitale ke bere, po janë kot se korrupsioni aty vazhdon. Mua personalisht doktori te 21 dhjetori mi ka kërkuar vetë lekët dhe kam ngelur pa fjalë, pastaj tjetra marketet me gjëra të skaduara, zarzavatet, frutat na mbytën me pesticide për mua këto gjëra janë urgjente të ketë kontrolle.
Në rubrikën e tij “Sy m’Sy”, Rama i kujtoi qytetarit realitetin e mjerë të spitaleve para se PS të merrte mandatin.
Ai tha se janë ndërtuar 53 spitale të reja dhe tanimë mjekët dhe infermierët janë të mirëpaguar.
“Po çfarë të them, si të them? “Spitale ke bërë, por janë kot”. Nuk e kuptoj si mund të jenë kot?! 53 spitale të reja. 10 që nuk ekzistonin. 43 që u shembën përtokë dhe u ribënë komplet nga e para me standarde më të larta europiane. E morëm detyrën në një Shqipëri me spitale që ishin ndërtuar në vitet ’60-’70 dhe ishin vetëm arnuar në vitet ’90-2000, një tmerr.
Me shtretër lufte akoma, me batanije nga ato ushtaraket me qime si letër zmeril. Banjot me ujë rrjedhje në korridor gjithandej. Ilaçe, harroje. Pajisje për operacione ishin te shekullit të kaluar. Niveli i sterilizimit, mysybet. Infeksionet post operatore më të lartat në Europë.
Mjekët heronj, jepnin e merrnin si në luftë, në mes të Europës, shekulli 21. Autoambulancat, ndizeshin me të shtyra dhe urgjencat vareshin nga oraret e gjumit të rojeve që I linin hapur ato telefonat, për të mos u përgjigjur, me atë telin varur. Nuk po flas për qendrat shëndetësore. Mesjetë e thellë. Katastrofë.
Sot, sot kemi 400 qendra të reja shëndetësore të bëra nga e para që u shërbejnë 1.6 milion qytetarëve. Kemi një urgjencë kombëtare me 320 automjete të pajisura me aparatura jetë shpëtuese, që të gjitha. Kemi mjekë të mirë paguar. 140% më shumë sesa deri dje. Infermierë me 112% më shumë se deri dje.
Paguajmë 120 milion euro për të rimbulsuar barnat. Kontrollojmë gati gjysmë milion njerëz në vit për shëndetin me analiza falas. Kryejmë 60 mijë ndërhyrje kirurgjikale në vit dhe 164 lloj testesh laboratorike që deri dje bëheshin vetëm në privat, copë-copë, sa këtej e sa jashtë.
Janë kryer 16 milion e 800 mijë ekzaminime me aparatura të fjalës së fundit dhe të gjitha janë falas. Ka plot akoma, por po ndalem këtu duke thënë se Qendra Spitalore Universitare Nënë Tereza, ka nisur bashkëpunimin dhe do të njehsohet me Qendrën Spitalore SHIBA në Izrael, që u rankua e 8-ta në botë për 2024 për nivelin e lartë të ekselencës. 2 spitale ultra-moderne do të ndërtojmë gjatë mandatit të 4-tërt në bashkëpunim me Emiratet e Bashkuara dhe me strukturën më të mirë spitalore të Italisë, një nga më të mirat e botës.
Dy ekselenca botërore që do të sigurojnë që të mos kemi më nevojë të çojmë askënd jashtë për asnjë operacion të komplikuar, por jo vetëm kaq. Por të vijnë këtu të kurohen edhe shqiptarët që janë jashtë. Jo më, o burra, ikim në Turqi, ikim në Greqi, ikim në Itali. Jo,. Jo! Në Shqipëri! Më e mira është e gjitha përpara, prandaj dhe qentë do të lehin shumë fort deri në 11 maj, por karvani do të shkojë aq përpara sa Shqipëria 2030 do të jetë anëtare krenare e Bashkimit Europian”, tha Rama.
