Ministrja e Shtetit për Marrëdhëniet me Parlamentin, Elisa Spiropali ka mbajtur fjalën e saj në seancën e sotme plenare për shkarkimin e Presidentit, Ilir Meta.
Nga foltorja e Kuvendit, Spiropali tha se Meta nuk bëri lapsuse, por nuk la gabim pa bërë. Ajo theksoi se Presidenti ka rrezikuar marrëdhëniet me partnerët ndërkombëtarë si dhe ka shkelur disa herë të drejtat dhe liritë themelore të njeriut.
“Presidenti nuk bëri nja dy a tre ofendime, shitje a lajthitje. As nuk hëngri dhe bëri thërrime, apo punoi dhe bëri gabime. Po të ishin lapsuse askush nuk do ia vinte re. Nuk la gabim pa bërë. Rasti nuk është i zakonshëm, problemi i presidenti është i rëndë, ndoshta klinik dhe me pasoja. Që mund të ndreqet vetëm me masa ligjore. Kemi arsye të mjaftueshme. Faktet dhe provat për veprimet dhe sjelljet e tij, na i ka dhënë vetë presidenti. Nuk kanë të numëruar, bëmat, gjërat, ulërimat, klithmat e Presidentit tonë. Presidenti u ka fyer shqiptarëve inteligjencën. Është autor i mesazheve që frymëzonte daljen në rrugë të militantëve.
Mesazhet denigruese ndaj diplomatëve të huaj si njerëz të shitur dhe të blerë, duke na rrezikuar marrëdhëniet me partnerët është tjetër veprim me pasoja të rënda. Detyroi ambasadoren ti drejtohet hapur për ti këshilluar vetëpërmbajtje. Është vetëshpallur përfaqësues i një pjesë të popullit. Presidenti ka dëmtuar autoritetin kushtetues të kreut të shtetit. Presidenti ka dhunuar parimin e asnjëanësisë duke refuzuar anëtarë të sistemit gjyqësor, duke mos emëruar funksionarë shtetërorë. Me ndërgjegje të plotë ka dëmtuar rëndë marrëdhëniet institucionale. Me sjelljen e tij të çekuilibruar, gjuhën e padenjë.
Presidenti ka shkelur një numër herësh të drejtat dhe liritë themelore të njeriut. Ka denigruar qeverinë dhe opozitën parlamentare, duke përhapur akuza të rreme për ndërhyrje në punët e brendshme. Presidenti ka ndërmarrë sulme publike kundër ambasadës së SHBA. Ka mbajtur qëndrime publike ofensive edhe kundër përfaqësuesve të tjerë të huaj duke i akuzuar si të korruptuar. Presidenti ka përdorur vetë dhe u ka sugjeruar të tjerëve retorikën e dhunës. Presidenti ynë kupën nuk e ka mbushur, e ka derdhur.
Nuk jemi mbledhur që presidentin ta shajmë dhe ta pushkatojmë, por thjeshtë ta largojmë. Aq e ka tepruar sa në këtë sallë të ishte i gjithë populli s’do kishte mbetur kush pa i dhënë leksion e plotë. Zbritjen nga karrigia e lartë që e përdhosi. Mos u takofshin kurrë në raste si ky i sotmi,” deklaroi Spiropali./Opinion.al
