Ka ardhur në jetë në Spanjë një foshnje e lindur me mikrocefali, një defekt i shkaktuar nga virusi Zika. Ky është rasti i parë në Europë i një fëmije të lindur me defektin e bashkëshoqëruar me këtë virus.
Nëna e fëmijës është diagnostikuar në muajin maj me virusin Zika, por ajo ka vendosur ta mbajë fëmijën. Shtatzënia e saj ka qenë në javën e njëzetë kur ajo ka mësuar se po bart virusin, të marrë gjatë një udhëtimi në Amerikën Latine.
Mjekët e spitalit në Barcelonë raportojnë për një gjendje të qëndrueshme të fëmijës.
I përhapur nëpërmjet mushkonjave, virusi Zika sjell mikrocefalinë te të porsalindurit, apo, ndryshe, lindjen e tyre me përmasa më të vogla të kokës.
Në Spanjë ka 190 raste të të prekurve nga virusi Zika. 189 prej të infektuarve e kanë marrë atë gjatë udhëtimeve jashtë vendit, përgjithësisht në vendet amerikanolatine.
Virusi Zika e ka përhapjen më të madhe në Amerikën Latine, prej nga vjen dhe rreziku më i madh për bartjen e tij në Europë. /tesheshi.com/
