SPAK ka nisur hetimet për tenderin për pajisjet elektronike të votimit në KQZ për zgjedhjet. KQZ i është dërguar një kërkesë të firmosur nga kreu i SPAK, Altin Dumani më 16 gusht, për vënien në dispozicion të dokumenteve që lidhen me këtë tender.
“Prokuroria e Posaçme Kundër Korrupsionit dhe Krimit të Organizuar, për nevoja të hetimeve që po zhvillohen kërkon nga ana juaj dokumentacionin e plotë të praktikës së procedurës të prokurimit me nr.”REF-83073-12-23-2020″ me objekt “Sisteme/pajisje të teknologjisë së informacionit për identifikimin elektronik të votuesve dhe verifikim e tyre paszgjedhor” dhe të praktikës së procedurës të prokurimit me nr. “REF-89113-03-04-2021”, me objekt “Sisteme/pajisje të teknologjisë së informacionit për votimin dhe numërimin e votave” – thuhet në kërkesë.
Sipas kontratave të publikuara në Buletinin e Prokurimeve Publike, në janar të këtij viti, në total ishin 14 tendera me një faturë totale prej 1 miliardë e 539 milionë lekë ose rreth 15 milionë euro, të cilat KQZ i prokuroi me negocim të drejtëpërdrejtë.
Të dhënat e detajuara tregojnë se përfituesi më i madh i kontratave me negocim të drejtëpërdrejtë ishte kompania hollandeze Smartmatic International.
Kjo kompani përfitoi 2 procedura, atë të “Projektit pilot për votimin dhe numërimin elektronik” si dhe “Shërbimet Logjistike dhe Soft”me vlerë totale 1 miliardë e 16 milionë lekë, raportojnë mediat.
