Pasi Kuvendi votoi pro heqjes së imunitetit nga mandati i deputetit, mesditën e sotme SPAK ka depozituar në Gjykatën e Posaçme të Shkallës së Parë për Korrupsionin dhe Krimin e Organizuar kërkesën për arrestimin e Aben Ahmetajt.
SPAK kërkon arrestimin e Ahmetajt, pasi e akuzon atë për shpërdorim detyre, korrupsion, pastrim parash dhe përfitime të paligjshme.
Ditën që SPAK i kërkoi Kuvendit autorizimin për arrestimin e tij, ish-zëvendëskryeministri u largua nga Shqipëria. Sipas avokatit të tij, ai ndodhet në Angli së bashku me familjen e tij, duke iu shmangur deri më tani drejtësisë. Ahmetaj në një reagim të postuar në rrjetet sociale, deklaroi se do të dalë kur e vërteta sipas tij, të ketë marrë dritë dhe të lexohen të gjitha provat në favor të tij.
Ahmetaj akuzohet si i përfshirë në aferën e inceneratorëve, pasi gjatë kohës që ka qenë ministër, ka favorizuar biznesmenët Klodian Zoto dhe Mirel Mërtiri, duke marrë para prej tyre.
