Parlamenti i Kosovës nuk arriti të fusë sot në votim pr/ligjin e shumëdebatuar për ndarjen e kufirit me Malin e Zi, ose siç njihet ndryshe Demarkacioni. Në seancën e sotme plenare thirrur në kushtet e urgjencës pasi sesioni nis në mes të shtatorit, Demarkacioni u hoq nga rendi i ditës. Qeveria nuk i bëri dot votat për ta votuar draftin pasi Lista Serbe njoftoi se nuk do të shkonte në seancë. Edhe disa deputetë të tjerë në radhët e mazhorancës duket se nuk do ta votonin ndarjen e kufirit.
Pas vendimit për tërheqjen e Ligjit për Demarkacion nga seanca e sotme e Kuvendit, protestuesit janë shpërndarë duke brohoritur në shenjë fitoreje.
Opozita
Kryetari i partisë Nisma për Kosovën, Fatmir Limaj nuk është pajtuar me konstatimet e qeverisë dhe kryeministrit Isa Mustafa se tërheqja e ratifikimit të Demarkacionit ndërlidhet me presionet politike të opozitës. Limaj ka thënë se qeveria duhet ta pranoj se tërheqja e ratifikimit lidhet me mungesën e Listës Serbe në Kuvend dhe votave te koalicionit për ratifikimin e marrëveshjes. Në fund, Limaj ka ftuar qeverinë që të ulet me të gjitha subjektet relevante politike dhe të rifillojë procesi i shënjimit të vijës kufitare me Malin e Zi.
Ndërsa Kryetari i Aleancës për Ardhmërinë e Kosovës, Ramush Haradinaj u shpreh: “Kundërshtimi politik e qytetar, për tash e një vit, duke përfshirë protestat, peticionin e mbi 200 mijë qytetarëve, gazin në Kuvend dhe plot aktivitete opozitare e qytetare, e kanë dhënë efektin e vet dhe sot një numër i mjaftueshëm i deputetëve e kanë kuptuar se marrëveshja është gabim, dhe prandaj vota e tyre do të jetë kundër”.
Qeveria
Qeveria e Kosovës ka marrë vendim që të tërheq nga rendi i ditës Projektligjin për ratifikimin e Marrëveshjes për Demarkacionin e kufirit me Malin e Zi. Lajmi u bë i ditur rreth një orë pasi kishte nisur seanca që u karakterizua nga debatet.
Kryeministri i Kosovës, Isa Mustafa tha se vendimi lidhet me situatën e tensionuar. “Tërheqja nuk nënkupton se ne do ta rishqyrtojmë apo rinegociojmë marrëveshjen, por do ta shqyrtojmë momentin kur do ta procedojmë sërish”, ka deklaruar Kryeministri Mustafa.
Parlamenti
Seanca e sotme e Kuvendit të Kosovës ka filluar me rreth dy orë vonesë. Ajo u thirr në orën 11:30 por arriti në nisë punimet në 13:30. Replikat kryesisht ishin rreth aferës së përgjimeve të njohur si “Pronto II” dhe arrestimeve të fundit të gjashtë aktivistëve të Lëvizjes Vetëvendosje nën dyshimet për sulmin ndaj Kuvendit të Kosovës, që ndodhi më datën 4 gusht të këtij viti.
Ndërkohë, para nisjes së seancës, dy deputete të Vetëvendosjes janë ndaluar nga policia teksa hynin në sallë. Ato dyshohet se kishin me vete gaz lotsjellës, tha policia. Të ndaluarat janë Donika Kadaj dhe Aida Dërguti.
Jashtë parlamentit shumë qytetarë kanë protestuar kundër kufirit me Malin e Zi.
Protestuesit bënë thirrje të mos falen tokat. Ata kërkuan që deputetët të mos votojnë Demarkacionin. Protesta u mbajt nën kontroll nga dhjetëra forca policie. Para protestuesve folën aktivistët e Vetëvendosjes, të cilët u shprehën të vendosur për të mos lejuar miratimin e Demarkacionit. Protesta u shpërnda kur Parlamenti vendosi të shtyjë votimin.
Partia Serbe
Lista Srbska njoftoi që në orën 10:00 se nuk do të marrë pjesë në seancën e ditës së sotme, ku do të votohej marrëveshja për Demarkacionin.
Shefi i grupit parlamentar të Listës Srbska, Slavko Simiq, ka deklaruar që Lista Serbe me vendim unanim nuk do të marrë pjesë në këtë seancë, ngaqë ndihen të pasigurt.Sipas tyre ky vendim vjen pa ndikim nga Beogradi.
BE-ja
Ndërkombëtarët në Kosovë ndoqën me interes zhvillimet e sotme. Para nisjes së seancës, BE-ja në Kosovë u bëri thirrje të gjithë pjesëmarrësve të angazhohen për një ambient të qetë gjatë debatit dhe votimit. BE-ja në Kosovë, po ashtu rikujton se e drejta për të protestuar është një e drejtë demokratike, me kusht që ajo të jetë e shprehur në mënyrë paqësore dhe në pajtim me ligjet e Kosovës”, thuhet ndër të tjera në deklaratën e zyrës së BE-së në Kosovë.
Vetëvendosja
Lëvizja Vetëvendosje doli në një deklaratë ku tha se “Gjatë gjithë natës policia dhe grupacione të panjohura janë angazhuar në një fushatë pa precedent bastisjesh dhe shpifjesh, kundër VETËVENDOSJES! Arsyeja e vetme për këto gjeste diktatoriale, është dëshira e Thaçit, Veselit e Mustafës për t’ia dhuruar 8200 hektarë Malit të Zi, kundër ligjit, kundër vullnetit qytetar e kundër dëshirës së deputetëve”, u shpreh VV paraditen e sotme.
*Foto nga protesta e sotme në sheshin Skenderbe, Prishtinë
*Foto: bombat artizanale me molotov
