Në një seancë të jashtëzakonshme parlamenti pritet të mblidhet pasditen e sotme për të votuar ngritjen e komisioneve ad – hoc, që do të verifikojnë kandidatët për institucionet e Vettingut.
Kushtetuta përcakton që përbërja e këtij komisioni është e barbartë, ku tre anëtarë i takojmë maxhorancës dhe tre të tjerë opozitës.
Socialistët kanë përzgjedhur se kush do të jenë dy deputetët që do të zënë karriget në këtë komision, duke bërë publik emrin e Vasilika Hysit dhe atë të Ulsi Manjës, ndërsa anëtari i tretë i është lënë aleatit në qeverisje, LSI-së, e cila do përfaqësohet nga Luan Rama.
Mazhoranca mund të votojë sot vetëm anëtarët e saj dhe të lerë bosh vendet që i takojnë opozitës.
Opozita prej 53 ditësh ka bojkotuar Kuvendin dhe nuk do të jetë pjesë e votimit të mbrëmjes. Kryeministri Edi Rama, duke komentuar mbi seancën, u shpreh në një postim në rrjetet sociale mungesa e opozitës mund të jetë vetëm një bllokim i përkohshëm i këtij procesi.
“Sot në Kuvend nis rruga e Vetting -ut! Mund ta bllokojnë përkohësisht, po kurrësesi s’do ta pengojnë dot popullin të heqë qafe pengmarrësit e drejtësisë. Vetting -u për Shqipërinë që duam. Vetting -u Për Shtet. Vettingu për punë.”
Komisioni ad – hoc do të duhet të përzgjedhë 27 anëtarë të Komisionit të Pavarur të Kualifikimit, Kolegjit të Apelimit dhe nga dy Komisionerë publikë dhe zëvendësat e tyre.
Avokati i Popullit ka dërguar në parlament 84 kandidatura, ndërsa Operacioni Ndërkombëtar i Monitorimit dha vlerësim pozitiv për 67 prej tyre./tv Klan
