Elson Jaçaj, infermier në Qendrën Spitalore Universitare në Tiranë, ka marrë sot nga Drejtoria e këtij spitali letrën e largimit nga puna. Arsyeja e largimit është organizimi që po i bën protestës së infermierëve dhe mjekëve që do të mbahet në këtë spital më datë 20 dhjetor. Në një bisedë më gazetarin e Opinion Dritan Laci, infermieri Laçaj, ka treguar se si është thirrur sot në Drejtorinë e QSUT-së dhe i ëshët dorëzuar zarfi i shkarkimit nga puna.
Pyetje: Elson cila eshte e verteta e largimit tuaj nga puna?
E vërteta është thjesht organizimi i protestës dhe kërkesat që kemi ngritur si Shoqatë për Infermierët, që në thelb janë: rritje page, kushte më të mira pune; siguri në punë etj. Ka qenë kjo arsyeja që i ka bërë të reagojnë në këtë mënyrë duke bërë presion.
Pyetje: Kur ju është komunikuar largimi nga puna, dhe pse pikërisht ky urdhër ndaj jush?
Urdhëri për largimin nga puna më është komunikuar sot rreth orës 14:00 ku u telefonova nga Drejtoria e QSUT që të shkoja të terhiqja një zarf. Dhe kjo është edhe më e rëndë. Ndërkohë që e kanë për detyrë ta sjellin në institucionin ku punoj, duhet të shkoja unë ta merrja
Pyetje: Cili do te jetë qendrimi juaj në vazhdim?
Nuk kam bërë asnjë shkelje ligjore në argumentimin që ata japin në letër, kështu që do ta ankimoj në gjykatë dhe do pres vendimin. Por kjo më bën të marr zemër më shumë e mos ti le Infermierët të shkelen më padrejtësisht
Pyetje: Do ta organizoni protesten e parashikuar me herët?
Patjetër që po
Pyetje: A ka përkrahje kjo protestë edhe nga mjekët dhe infermierët, dhe mendoni qe mund ti bashkoheni edhe studentëve në shesh?
Ne fakt kjo i ka dhënë më shumë zemër të gjithëve. Patjetër që po, ndërkohë po më kontaktojnë shumë mjekë dhe infermierë që më thonë mos u tërhiq por ta organizojmë dhe më të fuqishme.
Pyetje: Edhe diçka të fundit. Sa vite pune keni që punoni si Infermier në QSUT, dhe a keni pasur më herët kercënime të tilla ju dhe kolegët tuaj?
Unë kam 13 vite pune që punoj në QSUT si infermier. Presione dhe kërcënime ka pasur në çdo kohë. Shpesh dhe lëvizje të brendshme si formë presioni. Por së fundmi janë shtuar shumë. Ndaj dhe numri i Infermierëve që duan të largohen është i madh. / Opinion.al
Foto: Faksimile e shkarkimit të punës
