18 vite më parë, më 12 shtator 1998, u vra themeluesi i Lëvizjes Studentore dhe kryetari i parë i Partisë Demokratike, Azem Hajdari. Eshtë një ndër ngjarjet më të rënda dhe më të bujshme të ndodhura në këto 26 vite në Shqipëri.
Azem Hajdari mbeti i vrarë nga një atentat në oborrin e selisë së Partisë Demokratike mbrëmjen e 12 dhjetorit të vitit 1998. Kryetari i atëhershëm i PD-së, Sali Berisha, akuzoi qeverinë Nano dhe vrasjen e Hajdarit e cilësoi politike. Partia Demokratike kishte rreth një vit që ishte në opozitë, pas humbjes në zgjedhjet e 29 qershorit 1997.
Për vrasjen e deputetit Hajdari u dënua Jaho Mulosmani, që vazhdon të vuajë dënimin. Janë akuzuar dhe vëllezërit Izet, Ismet Haxhia, njerëz që qëndronin shumë pranë kryeministrit Berisha.
Ish-truproja i kryeministrit Sali Berisha, Izet Haxhia, sipas akuzës, telefonoi Hajdarin dhe e nxori nga zyra e tij, ku dhjetë minuta më pas e ekzekutuan në pritë. Në një proces gjyqësor maratonë u cilësuan fajtorë Mulosmani, i cili u dënua përjetë, si dhe dy vëllezërit Izet e Ismet Haxhia që u dënuan përkatësisht me 25 dhe 20 vjet heqje lirie.
Aktualisht vëllezërit Haxhia janë të lirë, pasi Izet Haxhia ka fituar azilin politik në Turqi dhe është ankuar në Gjykatën e Strasburgut. Ndërsa Ismet Haxhia e kanë kryer dënimin dhe është liruar para disa muajsh.
Edhe pse dosja u mbyll me ndëshkimin e tre personave, asnjëherë nuk u tha motivi se përse u ekzekutua Azem Hajdari.
Ndërkaq, u tha se mbi deputetin kishte qëlluar me dorën e tij Fatmir Haklaj, i cili u vra më pas gjatë një atentati të mirëorganizuar.
