Ambasadori i Bashkimit Europian në Tiranë, Luigi Soreca deklaroi sot se nisma e fundit e qeverisë për të ndërhyrë në pasurinë e personave të dënuar, ose siç njihet ndryshe paketa “anti-KÇK”, tregon vullnet për të trajtuar problemin e korrupsionit dhe krimit të organizuar.
Soreca ishte sot në Vlorë ku mori pjesë në disa aktivitete sëbashku e kryetarin e Bashkisë, Dritan Leli. Në një prononcim për mediat ai u shpreh për herë të parë në lidhje me Operacionin Forca e Ligjit.
“Përsa i përket operacionit Forcat e Ligjit, ne kemi bërë dhe më parë një deklaratë dhe ne besojmë se logoja ‘ndiq paranë’ është mënyra më e mirë për t’u adresuar drejt këtyre personave, dhe tregon vullnetin politik për ta trajtuar këtë problem. Megjithatë, mënyra sesi do zbatohet ky ligj është shumë e rëndësishme dhe ne po e ndjekim nga afër aplikimin e këtij ligji.
Është shumë e rëndësishme që kjo strukturë e re të ndjek natyrisht parimet që kanë të bëjnë me sundimin e ligjit, por dhe me sundimin e të drejtave të njeriut, si dhe shumë e rëndësishme që kjo platformë të ndiqet nga SPAK. Jam në kontakt me ministrin e Brendshëm dhe javën që vjen do takohem me udhëheqësit e SPAK”, deklaroi Soreca.
Deklarata e tij shkon kështu në të njejtën linjë me atë të zyrës së BE dhe SHBA të cilët përshëndetën ndërmarrjen e kësaj nisme nga qeveria por nënvizuan se masat e reja të parashikuara duhet të sigurohen që të jenë konform zbatimit të të Drejtave të Njeriut dhe të ndiqen nga SPAK. /Opinion.al
