Nga njëra anë është Inter-i i vendit të dytë në renditje dhe që duket se është rigjeneruar nga kura Spalletti, nga tjetra një Milan në kërkim të rimëkëmbjes, pas një fillimi me ulje-ngritje që ka sjellë 3 humbje që tani. Ndeshja e të dielës në mbrëmjes, që do të luhet në një “San Siro” të mbushur plot, do të jetë shumë e rëndësishme për vazhdimin e sezonit. Zikaltrit do të kërkojnë fitoren e 7 radhazi që do t’i jepte atyre mundësinë të qëndronte mes të parëve në renditje, ndërsa kuqezinjtë duan të shkurtojnë në 4 pikë distancën me kushërinjtë. Për këtë arsye, do të jetë një sfidë me tension të lartë, e cila mund të bëhet akoma më e bukur nga fytyrat e shumta të reja të të dy skuadrave dhe nga shumë lojtarë që mund të rezultojnë vendimtarë.
Në shtëpinë e Inter, të gjithë sytë do të jenë te Mauro Icardi. Qendërsulmuesi argjentinas nuk ka një marrëdhënie shumë të mirë me derbin. Goli i tij i parë kundër kuqezinjve ka ardhur në përballjen e fundit të zhvilluar mes këtyre dy skuadrave në kampionat prillin e kaluar, e mbyllur në barazim 2-2. Për sa i takon takimeve të mëparshme, tifozët zikaltër nuk ia kanë falur atë gabim nga 11 metrat në derbin e sezonin 2015/16: nga barazimi i mundshëm te një humbje 3-0. Mauro ka realizuar gjashtë gola në këtë kampionat, por goli me aksion mungon që nga ndeshja e fituar në fushën e Roma-s.
Dhe kur flitet për lojtarë vendimtarë në derbi nuk mund të mos mendohet për Candreva-n. Shifrat lasin vetë: 2 sifda me Milan, 2 gola të shënuar. Me Spalletti-n është gjithmonë titullarë dhe, pas goli të shënuar kundër Shqipërisë, mund të gjejë edhe realizimin e parë në kampionatin italian. Ndërsa, ka realizuar 3 gola deri tani Ivan Perisic, të gjithë në fundin e ndeshjeve. Kroati dukej se do të përfundonte tek United në verë, por ka qëndruar dhe ka qenë një nga më të mirët në këto javë të para të kampionatit. Tifozët e Milan nuk e kanë harruar akoma golin e barazimit 2-2 të realizuar në minutat e fundit të derbit të fazës së parë në sezonin e kaluar.
Në shtëpinë e Milan, problemet fizike të Kalinic mund ta shtyjnë Moontella-n t’i besojë Andre Silva-s. Portugezi ka shkëlqyer edhe në ndeshjen e fundit të luajtura me kombëtaren e Portugalisë, që ka siguruar kualifikimin direkt në Rusi 2018 pas fitores 2-0 të marrë kundër Zvicrës. 21-vjeçari ka realizuar 9 gola në 10 ndeshjet kualifikuese me luzitanët. Ai ka qenë protagonist edhe në ndeshjet europiane të luajtura me kuqezinjtë: 6 gola në po kaq ndeshje, 1 çdo 65 minuta. Në kampionat ka luajtur vetëm 208 minuta dhe nuk ka shënuar akoma asnjë gol. Rasti i duhur mund të jetë pikërisht derbi.
Janë të paparashikueshëm, teknikë dhe të aftë të ndryshojnë ndeshjet. Suso dhe Bonaventura janë gati të shfrytëzojnë mundëinë e tyre. Dy mesfushorët sulmues kanë një dëshirë të madhe të tregojnë vlerat e tyre, pasi janë lënë jashtë formacionit titulluar në ndeshjen kundër Roma-s. Ish-lojtari i Atalanta-s, mes më të mirëve në sezonin e kaluar, duhet të gjejë shkëlqimin e humbur dhe përballja me kushërinjtë mund të jetë ajo e duhura. Lëvizjet et ij mund të vënë në vështirësi mbrojtësit shtatlartë të Inter, ashtu si ato të Suso, i cili ka rinovuar kontratën këtë javë dhe mund të aktivizohet mbrapa qendërsulmuesit.
Për sa i takon mbrojtjes, ajo e Inter është shumë më lart me vetëm 3 gola të pësuar deri tani. Zikaltrit, në fakt, kanë mbrojtjen më të mirë të gjithë kampionatit. Blerja e re Skriniar ka qenë një nga notat më pozitive të fillimit të sezonit dhe është përshtatur shumë mirë me qendërmbrojtësin tjetër Miranda. Nuk mund të thuhet e njëjta gjë për Leonardo Bonucci-n, blerja e bujshme e Milan-it në verë. Paraqitjet e tij kanë qenë shumë zhgënjyese, me mbrojtjen kuqezi që ka pësuar 10 gola deri tani. Për ish-mbrojtësin bardhezi nuk do të kishte rast më të mirë se derbi për të marrë një revansh. Tifozët milanistë, të cilët kanë humbur durimin me të, e urojnë një gjë të tillë./ Telesport
