Kjo e enjte, ishte dita e 4 e aksionit të nisur nga OFL. Deri tani sipas të dhënave zyrtare 14 persona të dënuar për krime të rënda, por edhe në hetim kanë kaluar në “sitën” e OFL-së .
7 prej tyre u është sekuestruar pasuria vlera e të cilëve përllogaritet në disa milionë euro, ndërsa 7 të tjerëve u është dorëzuar për plotësim vetëm formular me shkrim i auto-deklarimit. Emisioni Opinion ka trajtuar pikërisht këtë zhvillim, ndërsa në rrjetet sociale është hedhur një sondazh.
“Pas 4 ditësh, a po e justifikon pritshmërinë tuaj Operacioni Forca e Ligjit?” ishte kjo pyetja e sondazhit ku gjatë dy orëve të emisionit Opinion kanë votuar 6700 persona.
84 përqind mendojnë se OFL deri tani nuk e ka justifikuar atë që kanë pritur prej këtij aksioni. Emrat e publikuar deri tani nga policia, si subjekt i Ligjit Special, duhet t’u përgjigjen me shkrim të gjitha pyetjeve të OFL-së dhe përgjigjet e marra do t’i dërgohen SPAK-ut, i cili do të vlerësojë dosjen e përgatitur nga OFL-ja mbi aktivitetin kriminal të këtyre subjekteve, si edhe pasurinë e tyre.
Sapo të bëjë këtë vlerësim, SPAK-u duhet t’i kërkojë Gjykatës Speciale masën e sekuestrimit për pasuritë e subjekteve dhe pas sekuestrimit, në jo më shumë se 6 muaj Gjykata Speciale duhet të vendosë për konfiskimin përfundimtar të tyre./ Opinion.al
