Media franceze “Le Parisien”, ka shkruar për një 25-vjeçar me origjinë shqiptare, të cilit i është refuzuar kërkesa për natyralizim.
I riu qëndron prej 12 vitesh në Francë, ndërsa kërkesa e tij u refuzua me arsyetimin se nuk njihte emra të caktuar ministrash apo elementë të historisë së Francës.
Një argument që ai e kundërshton dhe përballë të cilit autoritetet e gjejnë veten të turpëruar sapo pyeten.
Dhjetë vjet qëndrim në Francë, me diplomë profesionale, dy punë me kontribute të dyfishta në buxhetin e shtetit, por për prefekturën e Haute-Vienne, 25-vjeçari nga Shqipëria, Antoine (emër që mediat franceze i kanë vënë të riut shqiptar për të mos i zbuluar identitetin) nuk justifikon kulturën e përgjithshme të mjaftueshme për t’u bërë shtetas francez.
I riu me origjinë shqiptare, pas refuzimit më 25 korrik e ka apeluar rastin dhe historia i tij tashmë ka marrë vëmendjen e mediave franceze dhe është kthyer në një çështje politike.
“Le Parisien”, ishte e para që zbuloi këtë histori që më pas u shpërnda në të gjitha mediat duke hapur debat rreth pyetjeve që parashikon testimi për nënshtetësinë.
“Ai është një djalë 25-vjeçar i ardhur nga Shqipëria në Francë që në moshën 14-vjeçare. Me familjen e tij, ai fillimisht fjeti në rrugë për disa muaj, pastaj gjetën strehim në Limoges. Djali tashmë ka një diplomë franceze në një shkollë profesionale. Ka punuar si kamarier për një kohë në një restorant dhe në të njëjtën kohë krijoi biznesin e tij të pastrimit të makinave. Pas njëmbëdhjetë vjetësh në Francë, ai aplikoi për shtetësi dhe u thirr për një test me gojë mbi historinë dhe kulturën franceze, dhe për fat të keq për të, ai dështoi. Ai kërkoi shpjegime dhe prefektura ia ktheu listën e pyetjeve që nuk kishte mundur t’i përgjigjej. Dhe rezulton se ato nuk ishin pyetje aq të lehta. Ai u pyet se ku janë Arromanche (një nga plazhet në Normandi) dhe Nouméa (në Kaledoninë e Re). Ai u pyet se kush ishte Edith Cresson, kryeministre e Francës në 1988, etj” shkruhet në “Le Parisien”.
Media franceze shkruan se i riu shqiptar i rritur në Francë flet frëngjisht pa të meta dhe se është aktiv në jetën e komunitetit lokal./Opinion.al
