Slogani i këtij viti i paraqitur nga Ministria e Turizmit “Taken by Albania” ku si referencë është marrë film i vitit 2008 nga Liam Neeson, në të cilin shqiptarët shfaqen si trafikantë të qenieve njerëzore, vijon të shkaktojë komente në mediat botërore.
Këtë herë ka qenë “News.com.au” që i ka dedikuar një shkrim këtij slogani duke e shkruar që në titull ‘një nga sloganet më të çuditshme për të promovuar turizmin që është parë ndonjëherë në botë’.
Shkrimi nis duke thënë se në botë janë parë shumë slogane të mira dhe të këqija për të promovuar turizmin, por ai i ofruar këtë vit nga Shqipëria është më i pazakonti.
Shqipëria ka shpërndarë konfuzion me këtë fushatë në titullin “I rrëmbyer nga Shqipëria” , i cili lidhet në mënyrë të pashmangshme me krahasimin e rrëmbimit në filmin “Taken”, ku protagonist është aktori Liam Neeson, i cili në rol është një agjent që trafikantët shqiptar i kanë rrëmbyer vajzën.
Në vijim të shkrimit thuhet se në pamje të parë ky slogan duket i pafajshëm pasi shprehja “të rrëmbehesh” përdoret me idenë ‘të magjepsesh’ dhe ‘të befasohesh’, por jo. Të nxitur nga vetëdijesim apo nga dëshpërimi i plotë, Ministria e Turizmit në Shqipëri e ka marrë referencën e “Taken” me qëllim.
Madje vendi i ka bërë apel edhe aktorit që ta vizitojë. Shkrimi vijon me citimin e mesazhit të dhënë për aktorin në promo ku thuhet: “Çkemi Liam. Në kulturën popullore Shqipëria është përshkruar si parajsa e drogës, kriminelëve dhe gangsterëve. Ne e kuptojmë që ky perceptim mund të bëjë për filma të mirë si ‘Taken’ I vitit 2008, por është tërësisht i pavërtetë.”
Përmes këtij slogani të ri turizmi Shqipëria përshkruhet si një vend i bukur dhe shumë i sigurt për t’u vizituar.
Sipas shkrimit të “News.com.au” perceptimet në rrjete sociale janë të ndryshme për këtë slogan, disa e pëlqejnë dhe disa jo. Në mbyllje të shkrimit “News.com.au” shkruan se të bësh një slogan për turizmin është një punë e vështirë. Vetëm një slogan duhet të tërheqë vëmendjen e miliona njerëzve dhe t’i bindë ata që të kalojnë kohën dhe paratë në vendin që po përpiqesh të ‘shesësh’./Xh.K/Opinion.al/
