Skënderbeu – Kukësi do të çelë sezonin e ri. Finalja e Superkupës që do të luhet sot në orën 20:00 në stadiumin “Selman Stërmasi” kthen futbollin shqiptar. Sfida që luhet prej vitit 1989 është edhe një mënyrë për të parë gjendjen e ekipit 2 javë para nisjes së kampionatit.
Si Skënderbeu dhe Kukësi vijnë me disa ndryshime nga sezoni I kaluar edhe pse te të dy skuadrat janë ende futbollistë, të cilët aktivizohen prej vitesh. Të rinj janë edhe trajnerët, Skënderbeu drejtohet nga italiani Andrea Agostinelli, ndërsa Kukësi nga Ernest Gjoka.
Te kuksianët është kthyer edhe Pero Pejiç pas një sezoni në Iran. Një sukses i korçarëve, që këtë verë nuk morën pjesë në kupat e Europës për shkak të përjashtimit nga UEFA për trukim ndeshjesh, do të ishte i treti në historinë e klubit pas Suerkupave të fituara në 2013 dhe 2014.
Kukësi luan për herë të parë në këtë finale pasi triumfoi në Kupën e Shqipërisë këtë vit. Skuadra kuksiane edhe këtë verë mori pjesë në Europa League duke kaluar një tur.
