Skënder Gega është larguar nga drejtimi i Partizanit. Mësohet se Gega së bashku me drejtuesit e Partizanit kanë vendosur që të mbyllin bashkëpunimin me njëri-tjetrin.
Lajmi është konfrimuar nga klubi i Partizanit, nëpërmjet një postimi në Facebook. Të kuqtë shprehen se ndërprerja e kontratës ka ardhur me mirëkuptimin e të dy palëve, për arsye personale të trajnerit Gega.
“Klubi i Futbollit Partizani falenderon trajnerin Skënder Gega për arritjen e fitimit të titullit të 16 Kampion të Shqipërisë, i cili u rikthye në shtëpi pas 26 vitesh. Trajneri Gega ka një meritë të padiskutueshme në arritjen e këtij suksesi fantastik. Falë kontributit, punës, sakrificës, përkushtimit dhe disiplinës, Gega arriti të krijonte një grup triumfues, duke fituar respektin e lojtarëve, stafit drejtuesve dhe tifozëve të shumtë të Partizanit. Klubi saktëson se për arsyet e tij personale, trajneri Gega ka vendosur të ndërpresë me mirkuptim kontratën mes dy palëve, për të mos vijuar të jetë në drejtimin e ekipit edhe në sezonin e ardhshëm. Presidenti Gazment Demi dhe Drejtori Olsi Rama dëshirojnë të falënderojnë trajnerin Skënder Gega, i cili pas suksesit si lojtar, arriti ti dhuroj klubit një tjetër trofe kampioni edhe si trajner i Partizanit. Klubi falënderon trajnerin Skënder Gega për emocionet dhe performancën e shkëlqyer që ekipi rregjistroi në drejtim e tij.”-thuhet në njoftimin e klubit.
Po ashtu, të njëjtin version ka dhënë dhe vet Gega, i cili thekson se e ndërpreu bashkëpunimin për arsye personale. Ai ka falënderuar të gjithë, nga presidenti Demi, deri te tifozët për mbështetjen që i kanë dhënë.
“Prej një viti pata nderin dhe privilegjin të drejtoj Partizanin, ekipin ku unë fillova dhe e mbylla karrierën si futbollist. Këtë sezon, në krye të pankinës së ekipit Partizani ka qenë periudha më e bukur që unë kam përjetuar si trajner, e mbushur me plot emocione dhe kënaqësi. Pas 26 vitesh ia arritëm të rikthejmë trofeun kaq të munguar. Për arsye personale kam vendosur të mos të jem më në krye të pankinës. Dua të falënderoj klubin e Partizanit, presidentin Demi për besimin dhe mbështetjen e tij gjatë të gjithë kohës, drejtorin Olsi Rama për bashkëpunimin, të gjithë stafin, ekipin për punën dhe mbështetjen, për kënaqësinë që më dhuruan. Por, edhe tifozët e mrekullueshëm të Partizanit për mbështetjen”, shkruan Gega në një deklaratë të publikuar po ashtu nga faqja zyrtare e Partizanit në Facebook.
Trajneri 55-vjeçar erdhi në drejtim të Partizanit në verën e vitit 2018, dhe që në vitin e parë arriti të rikthejë në shtëpinë e kuqe titullin kampion, pas plot 26 vitesh mungesë. Partizani nën drejtimin e Gegës arriti plot 20 fitore, 10 barazime dhe 6 humbje./ Opinion.al E.Xh.
