Një dashuri e refuzuar dyshohet se është shkaku i një krimi që përfundoi me një të vdekur e një të plagosur në Kavajë. Ngjarja e rëndë ndodhi rreth orës 00:40 duke u gdhirë e enjtja, në banesën e një 30-vjeçareje. Viktima është Dritan Haxholli 41 vjeç, një ish i dënuar për lëndë narkotike dhe për krime kundër personit.
Sipas burimeve mësohet se viktima dhe gruaja kishin pasur një lidhje dashurie por edhe pse se gjithçka kishte marrë fund, Dritan Haxholli vijonte te këmbëngulte. Por ndërkohë në dijeni të ngacmimit ishte edhe Bledar Toçi, i cili po ashtu kishte një lidhje me vajzën.
Haxholli kishte marrë në telefon ish-të dashurën e tij duke e lajmëruar se do të shkonte në banesë për tu sqaruar. Ai ka shkuar i armatosur ndërsa ka parë që në shtëpinë e ish të dashurës ndodhej edhe Bledar Toçi, që kishte shkuar ta ndihmonte.
Në momentin kur Haxholli është futur në banesë i armatosur me kallashnikov para tij ka dalë polici i burgjeve Bledar Toçi dhe ka tentuar ta ndalë, por i 41-vjeçari e ka qëlluar duke e plagosur. Në këto kushte efektivi ka nxjerrë armën e shërbimit pistoletë dhe ka qëlluar në drejtim të Haxhollit duke e lënë të vdekur.
Dëshmia e 30-vjeçares
Marsida Qatja ka deklaruar para oficerëve të policisë gjyqësore se ajo kishte patur një lidhje me më parë me Dritan Hoxhollin, por më pas ishin ndarë. Por, sipas saj, pas ndarjes ai i kërkonte vazhdimisht marrëdhënie seksuale duke e shqetësuar vazhdimisht. Ajo deklaron se ka diskutuar me Bledar Tocin, me detyrë shef i sigurisë në burgun e Durrësit duke i shprehur shqetësimin e saj.
Nga ana tjetër 31-vjeçari Toci i ka thënë se do e zgjidhë ai këtë çështje dhe do të fliste me 41-vjeçarin.
Në mbrëmje Toci dhe dy miq të tjerë të gruas kanë shkuar në banesën e tij dhe më pas ka ardhur me kallashnikov Haxholli, i cili ka shkatërruar me tytën e armës grilën e dritares së apartamentit që ndodhet në katin e parë të një pallati në lagjen nr.2 të Kavajës.
Pas ngjarjes
Shef i sigurisë në burgun e Durrësit, Bledar Toçi është dërguar me urgjencë në spitalin e traumës dhe ndodhet jashtë rrezikut për jetën. Gjatë kontrollit në banesën e Bledar Toçit, policia gjeti lëndë narkotike dhe arrestoi vëllain e tij Berndard Toçi. 30-vjeçarja jetonte e vetme me 3 fëmijët e saj ndërsa bashkëshortin e kishte të dënuar në një vend të Bashkimit Europian./ Opinion.al
