Ekzekutimi i biznesmenit Kastriot Reçi vijon të jetë ende pa autor. 47-vjeçari, i cili ishte edhe pronar i televizionit “Media Plus”, u vra me snajper në qendër të Rrëshenit mesditën e të martës.
Përgatitja e atentatit, sipas hetuesve, duket se ka qenë e mirëmenduar. Pasi prej ditësh ka vëzhguar gjithë lëvizjet, autori i maskuar si femër është futur në një hyrje apartamenti të një pallati të braktisur nga tërmeti.
Një hapësirë e vogël, por e mjaftueshme, mes murit dhe grilës së dritares, i ofronte snajperistit fushëpamjen e plotë të qendrës së Rrëshenit, pikërisht aty ku po kalonte 47-vjeçari Reçi për të shkuar në lokal.
Burimet policore thonë se snajperisti kishte përdorur armë me silenciator, dhe për këtë arsye nuk u dëgjua krisma, sikurse kanë pohuar dhe dëshmitarët, të cilët janë shprehur se vetëm kanë parë Kastriot Reçin të rrëzohej në tokë, por nuk kanë dëgjuar asgjë.
Po ashtu është mësuar se banesa nga ku u qëllua biznesmeni ishte e shokut të Armando Gjinit, i ekzekutuar në gusht të vitit të kaluar.
Edhe vrasja e Armando Gjinit (Tonin Gjinit) sipas hetuesve ka qenë e planifikuar në detaje. Vrasësit siç duket e kanë ndjekur Tonin Gjinin hap pas hapi. Në automjetin e tij, ku dhe u qëllua, Gjini ishte së bashku me familjen por autorët u “kujdesën” që plumbat të kapnin vetëm atë./ Opinion.al
