Tri vajzat e mitura kanë treguar se kush ka abuzuar seksualisht me to. Në dëshmitë e tyre në prokurori, mësohet se djemtë më të rritur 14 dhe 16 vjeç, që banojnë në të njëjten shtëpi i kanë detyruar ato të shikojnë filma porno si dhe të kryejnë marrëdhënie seksuale në kushte presioni e kërcënimi. Në bazë të aktit të ekspertimit përkatës, rezulton se tre fëmijë të mitur femra janë abuzuar seksualisht dhe defloruar.
Prokuroria e Shkodrës ka krijuar dyshime të arsyeshme se dhuna seksuale ka ardhur për shkak të neglizhencës së personelit të Qendrës Rezidenciale.
Në qendër jetojnë 35 fëmijë, të gjithë me prindër. Por për shkak të ekonomisë së dobët i kanë sistemuar këtu. Për këtë arsye ata kanë marrë dhe statusin jetim social.
Pas lajmeve për abuzime seksuale, një nënë që në qendër ka sjellë tri vajza, duket e alarmuar.
Drejtori i Shtëpisë së fëmijës ende nuk është i qartë çfarë ka ndodhur. Ai pret hetimet për ta zbuluar.
Ndërkohë Gjykata e Shkodrës vendosi arrest me burg për pesë zyrtarët e arrestuar mbrëmjen e mërkurë. Të arrestuarit janë: ish-Drejtoresha e këtij institucioni Albana Llazani dhe katër punonjëse të tjera të jetimores. Ato akuzohen për keqtrajtim të të miturve dhe shpërdorim të detyrës. Gjatë hetimeve të kësaj çështje janë pyetur të gjithë femijët e institucionit dhe të qëndrës Rezidenciale të Fëmijëve Shkollorë 6-18 vjeç. Paraprakisht rezulton se ata janë dhunuar psikologjikisht e fizikisht.
Shqetësues mbetet fakti se po të njëjtat vajza të mitura ndaj të cilave është abuzuar seksualisht vazhdojnë të jetojnë në të njëjtin institucion me autorët e dyshuar.
