Pas skandalit me tenderin e Unazës së Madhe, kryetarja e LSI-së Monika Kryemadhi i është drejtuar sot me një letër Prokurores së Përgjithshme Arta Marku. Në letrën që mban firmën e saj, Kryemadhi kërkon nga kryeprokurorja pezullimin e punimeve në të gjithë projektin e Unazës së Re deri në sqarimin përfundimtar të rrethanave të kësaj cështjeje.
Më herët në një takim me Lëvizjen e Gruas Socialiste për Integrim, kryetarja e LSI, Monika Kryemadhi apeloi prokuroren e përgjithshme Arta Marku të hetojë megaskandalin e unazës së madhe.
“I bëj thirrje Arta Markut si si grua dhe si nënë, që sot ajo është përballë opinionit publik, përballë opozitës e ndërkombëtarëve të tregojë se vlerat e një gruaja janë më të forta se të institucioneve e tundimi e paraja. Ajo sot duhet të jetë e sinqertë me veten e saj, me fëmijët e saj me gratë shqiptare. Hetoje si burrneshë nëse je burrnesh se sot ke shansin për ti dhënë emër grave dhe vajzave shqiptare.”- deklaronte Kryemadhi ne takimin me Levizjen e Gruas per Integrim më 8 dhjetor.
Në letrën në fjalë, Kryemadhi shprehet se ndonëse është vendosur për nga ARRSH pezullimi i punimeve në Lotin e 1 të projektit, rezulton se punimet vijojnë në të gjithë aksin.
Për këtë LSI shkruan:
“Nisur nga rëndësia shumë e lartë e kësaj çështje, në të cilën preken drejtpërdrejtë e drejta e pronës, si e drejtë themelore Kushtetuese e banorëve të zonës, ku shtrihet gjurma e këtij projekti, duke theksuar gjithashtu shqetësimin e e interesit publik lindur prej fakteve të bëra publike të cilat kanë krijuar bindjen e arsyeshme se qëllimi i këtij projekti dhe procedura e ndjekur për zbatimin e tij ka qenë thellësisht korruptive dhe me shkelje të rënda të ligjit:
Kërkojmë nga ana juaj marrjen e masës së pezullimit të punimeve në të gjithë projektin e Unazës së Re deri në qarimin përfundimtar të rrethanave të kësaj çështjeje”.
