Siguria e të dhënave të qytetarëve është kërcënuar përsëri, ndërsa qeveria ka zgjedhur të heshtë edhe këtë herë. Pas skandalit të publikimit të pagave të muajit janar, tashmë janë bërë publike numrat e telefonit të 3 milionë shqiptarëve, reklamuar në një faqe në internet për t’u shitur.
Lidhur me këtë çështje ka folur në “ABC”, eksperti i sigurisë, Besmir Samanaj, i cili shprehet se dalja e databazës rrezikon privatësinë e shqiptarëve.
Samanaj tha se të dhënat me numrat e shqiptarëve në kombinim me të dhënat që kanë dalë muaj më parë si kartat e identitetit dhe pagat mund të përdoren nga kriminelët për të klonuar identitetin e qytetarëve.
“Është shumë shqetësuese, sepse kjo rrjedhojë e të dhënave nuk po ndalon. Po shton riskun te qytetarët shqiptarë për tu mbrojtura nga sulmet kibernetike.
E-Albania në vetvete nuk mban të dhëna, por ka akses në të gjitha sistemet e IT-së të qeverisë shqiptare.
I vetmi institucion që ka akses te të gjitha të dhënat është AKSH-i. Kemi thyerje të sigurisë kibernetike. Personat që kanë bërë këto akte kanë qenë të vetëdijshëm për riskun dhe për të dhënat.
Çfarë tjetër ka ngelur pa nxjerrë? Problemi kryesor nis me nxjerrjen e të dhënave të para. Kur do të ndalojë kjo, Nuk kishim hetim të mirëfillte të hetonim se nga dolën këto të dhëna. Mund të jetë e njëjta bazë të dhënash që doli muaj më parë dhe po del në publik pjesë. Është shumë e vështirë në fushën e krimit kibernetik që të zbulohet se kush i nxori të dhënat. Databaza me numrat celular, i disa muajve më parë”, tha Samanaj.
Kujt i intereson 3 mln numra telefoni?
“Pasuria më e madhe në kohën dixhitale janë të dhënat. Më erdhi shumë keq që çmimi për kaq të dhëna ishte i lirë. Mund të përdoren për marketing online dhe shitje online.
Pjesa tjetër është përdorimi I këtyre të dhënave nga keqpërdoruesit. Janë mesazhe shantazhe që x video e jotja është regjistruar këtu, klikoni këtu dhe kur klikoni hyn virusi në telefonin tuaj.
Po flasim për nr të telefonit të moshës së tretë dhe numrat e telefonit të fëmijëve tanë. Këto mund të bien pre.. Keqbërësit mund të bëjnë targetime të shumta të sakta, sepse krahas numri është emri, gjinia dhe mosha.
Ekstremi është pjesa e vjedhjes së identitetitn të dhënat mund të kryqëzohen me të dhëna të tjera që kanë dalë. Krimineli mund të hap një llogarin në kripto. Një kriminel mund të klonojë identitetin”, tha eksperti.
