Seancat plenare në vendin tonë jo pak herë kanë zgjatur për orë të tëra dhe kjo nuk është një gjë e re, por për disa deputetë të Kuvendit të Shqipërisë, ato janë shndërruar ‘torturë’ në vete. Kështu gjatë orëve të zgjatura të diskutimeve parlamentare këtë deputetë kanë gjetur mënyra të ndryshme për të kaluar kohën. Disa luajnë me celularë, disa futen për të naviguar në rrjete sociale, por ka edhe nga ata që hapin faqe erotike.
Ky është shqetësimi që është ngritur në mbledhjen e Konferencës së Kryetarëve, në datën 4 tetor, shkruan Shqiptarja.com.
Kanë qenë vetë deputetët ata që janë ankuar tek organet e Kuvendit të Shqipërisë, duke qenë se mediat të vendosura mbi sallën e Parlamentit kanë publikuar atë çka deputetët bëjnë me telefonat e tyre gjatë seancave të ndryshme.
Ka qenë deputetja e PS-së e cila gjatë mbledhjes së Konferencës së Kryetarëve u ka kërkuar kryetarëve të grupeve parlamentare të Partisë Socialiste Taulant Balla, Partisë Demokratike Edmond Spaho dhe Lëvizjes Socialiste për Integrim Petrit Vasili, që ta diskutojnë këtë shqetësim me deputetët që hapin faqe në internet me përmbajtje jo etike.
“Është ngritur një shqetësim lidhur me sjelljen e deputetëve në sallën e Kuvendit dhe raporti me medien. Meqenëse ne i kemi të gjitha kamerat lart, shumë deputetë gjatë seancave hapin internetin në faqe nga më të ndryshmet dhe ndonjëherë jo etike dhe pastaj dalin në media. Ky është një problem i madh shqetësues, sepse ka raste që edhe deputetët acarohen me stafin e Kuvendit, ndërkohë që stafi i Kuvendit, qoftë edhe ata që mbulojnë medien nuk mund të mbajnë përgjegjësi për veprimet tona si deputetë, që hapim, lexojmë dhe medie nga lart pastaj i nxjerr. E them këtë që ju kryetarët e grupeve parlamentare është mirë, është pjesë e etikës në fakt dhe Rregullorja e Kuvendit e ka që nuk përdoren celularët, por… Ata janë ankuar, z. Vasili… Ekzakt, por ata nuk mund të ankohen për stafin e Kuvendit, nëse i stafi i Kuvendit nuk arrin dot të menaxhojë mediat lart”, – është shprehur deputetja Hysi.
