Brenda një dite të vetme policia italiane ka arritur të bllokojë në Leçe dy gomone me kanabis të nisura nga Shqipëria që në total transportonin 1 ton e 11 kg kanabis sativa.
Operacioni i parë është kryer mëngjesin e djeshëm ku u kap gomonia me 734 kg lëndë narkotike në Torre Chianca. Ndërsa në orët e pasdites, po të ditës së djeshme, u kap gomonia e dytë në San Cataldo të Leçes me 277 kg Cannabis Sativa.
Në operacionin e dytë policia thotë se janë arrestuar katër shtetas shqiptarë , ku tre prej tyre rezident në Itali. Operacioni është kryer nga Skuadra Mobile e Leçes. Policia shqiptare thotë se mori pjesë në këtë operacion. Janë arrestuar në flagrancë katër shtetas shqiptarë, ku njëri prej tyre ishte skafist ndërsa tre të tjerët e prisnin në breg dhe konkretisht:
E.D, 39 vjeç , banues në Vlorë, drejtuesi i Skafit,
B.S, 29 vjeç, nga Vlora , rezident në Itali,
A.M, 29 vjeç, nga Vlora , rezident në Itali,
G.D, 39 vjeç, nga Vlora , rezident në Itali.
Operacioni i parë
Guardia di Finanza pas sinjalizimeve të dhëna nga Policia e Shtetit ka arritur të ndalojnë një gomone rreth 6 m, me dy shqiptarë me inicialet A.P. 43 vjeç dhe G.S. 39 vjeç në bord, të cilët transportonin rreth 734 kg Kanabis.
Gomonia kishte dy motorë prej 250 Kuaj-fuqi dhe një tjetër motor rezervë në bord. Të ndihmuar nga njësia ajrore e Frontex me avion dhe helikopter të Guardia di Finanza është bërë i mundur ndalimi dhe sekuestrimi i gomones. Personat në bord janë arrestuar nga autoritetet policore italiane.
