Policia kufitare e Vlorës ka kapur pasditen e kësaj të shtune një tjetër mjet lundrues që dyshohet se do të përdorej për trafikim të lëndëve narkotike, pavarësisht se nuk u gjet asgjë e jashtëligjshme në të.
Dy italianë janë ndaluar nga policia kufitare në Vlorë në plazhin “Darëzezë-Hoxharë”. Ata lundronin me një skaf 8 metra me dy motorë (225 KF secili). Policia thotë se skafi me dy italianët në bord (A.D 64 vjeç dhe F.M 65 vjeç) u kap rreth orës 17:45.
Sipas bluve të qytetit bregdetar, gjatë kontrollit në skaf nuk janë konstatuar materiale apo sende të kundraligjshme.
Nga veprimet hetimore në ndjekje të këtij mjeti, mësohet se të dy italianë kanë rënë në gjurmët e radarit të Policisë Kufitare Vlorë duke lëvizur nga veriu në drejtim të jugut të ujërave tona bregdetare.
Policia ka bërë bllokimin e mjetit lundrues.
Sipas Policisë së Vlorës, po kryhen veprimet e mëtejshme proceduriale në lidhje me intervistimin dhe sqarimin e rrethanave të mëtejshme. /Gazeta Express/
