Dy mjete lundruese janë sekuestruar nga policia e Vlorës dhe Delta Force pasi pronarët nuk kishin dokumente për përdorimin e tyre. Policia thotë se sekuestrimet janë bërë në zbatim të planit për goditjen e rasteve të trafikimit të lëndëve narkotike. Pra kishte dyshime se këto mjete mund të përdoreshin për trafik droge.
Kështu, dje në rrugën Radhimë-Vlorë, në bregdet u sekuestruar një skaf 5.10 metra dhe gjërësi 2.10 m, si dhe me një motor të markës “Ervinrude” në pronësi të shtetasit F.H.
Sipas policisë pronari nuk dispononte dokumentacionin përkatës për zhvendosjen e mjetit lundrues nga Jala për Durrës duke mos njoftuar autoritetet përkatëse.
Policia ka filluar procedimin penal ndaj shtetasit F.H., për veprat penale “Zotërimi dhe mbajtja”, “Ndryshimi i kushteve”, “Regjistrimi, klasifikimi, mënyra e përdorimit dhe kontrollit të mjeteve lundruese me motor, me tonazh nën 20NT” .
Po dje, në ujërat detare Hoxharë-Triport ka rënë në gjurmët e radarit të policisë kufitare një mjet lundrues, tip Gomone, me gjatësi 7.52 m dhe 3.08 m, me 2 motora të markës “Yamaha” në pronësi të shtetasit E.G. Nga hetimet e kryera ka rezultuar se mjeti është nisur nga Porti i Durrësit pa certifikatë përdorimi nga policia kufitare.Policia ka filluar procedimin penal në ngarkim të shtetasit E.G., për veprën penale “Mosdeklarimi i ndryshimeve”, bazuar në ligjin për mjetet lundruese./opinion.al
