Gjatë 24 orëve të fundit, situata e zjarreve në vend është ndikuar nga temperatura dhe thatësira, duke kërkuar ndërhyrje nga strukturat operacionale të Mbrojtjes Civile.
Nga 25 vatra zjarri të raportuara, 19 janë shuar dhe vënë nën kontroll, ndërsa 6 vatra mbeten ende aktive dhe janë nën monitorim nga ekipet në terren.
Një vatër e veçantë dhe problematike, për shkak edhe të terrenit të vështirë është ajo në fshatin Shëngjin, njësia administrative Fan, bashkia Mirditë, ku zjarri ka përfshirë një sipërfaqe të madhe me kullotë, shkurre dhe pisha. Aktualisht, zjarri është nën kontroll dhe nuk paraqet rrezik për zona të banuara.
Gjithashtu, mbeten aktive vatrat e zjarrit në Surroj dhe Shishtavec, bashkia Kukës – Skuraj, bashkia Kurbin – Sopot, bashkia Delvinë dhe Luf, bashkia Pukë, por ato nuk përbëjnë rrezik për qytetarët dhe pronat.
Në operacionet e fundit për shuarjen e zjarreve janë angazhuar:
– 128 forca zjarrfikëse,
– 80 forca ushtarake,
– 17 efektivë të Policisë së Shtetit,
– 69 nga strukturat e emergjencave civile të pushtetit lokal,
– 14 punonjës të administratës së zonave të mbrojtura,
– 42 pjesëtarë të shërbimit pyjor, dhe
– 52 vullnetarë.
Gjithashtu, në operacion është përfshirë edhe helikopteri Cougar, duke ndihmuar strukturat operacionale në kontrollin dhe shuarjen e zjarreve.
Duke marrë parasysh temperaturat e larta që favorizojnë përhapjen e zjarreve, Ministria e Mbrojtjes fton qytetarët, veçanërisht fermerët dhe blegtorët, të shmangin kategorikisht ndezjen e zjarreve për çdo arsye.
